الأربعاء، أبريل 29، 2009

حكايتى مع القراءة

الكتاب والقراءة من امراضى التى لا اشفى منها, كلما رأيت كتابا او مجلة او اى شىء مكتوب تذيغ عينى عليه سواء كنت فى الشارع او فى مكتبه او فى اى مكان به لمحة من كتاب.

أشعر بزهو عندما اقرا عنوان كتاب ويعجبنى اشعر ان عالمه قد سيطر على جنباتى ,اختلط بعالمه السحرى واغوص بين صفحاته.

كلما قرأت كتاب واعجبنى من بدايته اشعر بمتعة خفية ,بعالم من المتعة الحقيقية , اعيش
مع الاحداث .كأنى واحد من الشخصيات التى نسى الكاتب ان يذكرها.
فى كل مرة يعجبنى كتاب ,.......احمله معى بين اوراقى , تحت مخدتى ,اعيد قرأة الاجزاء التى اعجبتنى منه ,احاول حفظها فى ذاكرتى فاعيدها مئات المرات ....ولكنى افشل فى حفظها وازداد تمسكا بقرائتها مجددا.

اتحدث لاصدقائى بالكتاب الذى اعجبنى, احرق احداثه وتفاصيله التى تملكتنى واجعلهم يملون من التفاصيل المميزة بالنسبة لى .
فى البداية كان المال العائق لشراء الكتاب , ولكن بعد فترة اصبح العائق هو الاسرة التى تؤنبنى على الاموال التى اصرفها على شراء الكتب والتى لا تنتهى الا بهروبى من الحوار
او بأقناعهم انى لم اشترى بمبلغ كبير, وقد اكون خبأت نصف الكتب قبل الوصول للمنزل بين طيات مشترياتى الاخرى .

اعيش مع الكتاب لفترة ثم ابقى متعلقا بافكارة لايام حتى ياتى غيره , ثم اعيش مع غيره حتى ياتى غيره . لكن اتذكر مجمل احداثه وانبهر كلما تذكرت وقتى الممتع معه.
انا من النوع السىء الذى يتعلق باشياءه الممتعة لفترة ثم يبحث عن غيرها من المتعة الجديدة فى صورة مختلفة .

الكتاب بالنسبة لى ليس صديق بل هو عالم سحرى اعيشه وامتلكه لا يعرف مكنوناته غيرى ولا يشعر بمتعته الا محبى القراءة مثلى .

لا الوم نفسى على هوايتى ولكنى الوم نفسى على ما ضاع منى بلا قراءة .............

السبت، أبريل 25، 2009

قانون مرورك يا مصر

هل تخيلت نفسك فى يوم مجرورا الى القسم او النيابة ,وفى يدك كلابشات تزين معصمك سواء الايمن او الايسر ؟؟
بالتاكيد أجابتك ستكون ...لا طبعا ..
أحب أبشرك أن هذه الصورة ممكن تتغير لو معاك عربية؟؟؟؟؟
هتقولى اه قصدك إنى ممكن أخبط حد وأموته - أهو يبقى اللى مات أستريح من الهم - أقولك للاسف لا ده أهون لك لانك ساعتها هتحس بالذنب بأنك غلطت فعلا او ان المرحوم هو اللى غلط او أن القضاء والقدر لعب دوره لنهاية حياة شخص كان ممكن يبقى نبغة من نوابغ مصر فى المستقبل - يعنى هى جت عليك ما أنت ناقص- بس تقول إيه هو النصيب جه كده....
المشكلة أن موضوع الكلابشات وجرجرتك على القسم ممكن يحصلك بكل سهولة جدا وده ليه؟
لان سيادتك مشيت عكس إتجاه السير فى شارع جانبى نادرا ما يمشى فيه حد على رجله أصلا مش عربيات بدون علمك أن أتجاه سيرك عكس أتجاه السير - يا نهار اسود- أنت بالفعل مجرم عتيد تستحق العقاب اللى يُوقع عليك..
أزاى تمشى عكس السير فى الشوارع دى يعنى هو الكمين اللى عاملينه هيلم المجرمين أمثالك ازاى غير لو وقف هنا....
كل الموضوع ده أصله هو قانون المرور الجديد اللى ما حدش عرف عنه غير عقوباته والمثلث وشنطة الاسعافات لكن ايه حقوقك إيه التزاماتك ؟؟؟؟ ياعم هو حد عاوز حاجة من المرور غير إنه يرخص , ويدفع مخلفاته , ويجيب واسطة تنزلها وممكن كمان يشيلهالك خالص حسب قوة الواسطة...
بس للامانة موضوع الحبس ده مش بيحصل مع كل الناس .. يعنى مثلا من فترة كنت فى القاهرة ومشيت فى شارع عكس السير , وبصفتى غير قاهرى وأنى صعبت على الضابط وقلتله إنى مش من هنا ,وأن الغريب أعمى ولو مبصر فالراجل تطوع مشكورا وعمل ليا مخالفة حزام ودفعت الخمسين جنيه الغرامة زى الباشا وكنت مبسوط أنه مش خدنى على القسم ..هو أنا ناقص أصلا.. قلت فى سرى : أهرب يامعلم قبل ما يغيروا كلامهم .......
وبرضوا أحدى الصديقات مشيت فى شارع عكس السير بس حظها رزقها بضابط عاوز يتسلى وفضل يخوفها وأخدها فعلا على القسم ,وهناك قلها ( بخ ) ما تعمليش كده تانى وأمشى فى الطريق صح , ما تمشيش عكس السير تانى طبعا مش مهم ( البخ ) المهم أنها مشيت سليمة بدل ما على رايها هتبقى رد سجون

نداء الى المرور ركزوا أكثر على الطرق السريعة اللى فيها بيكون عكس السير قاتل وسيبكم من الاستسهال والتماحيك فى الشوارع المهجورة اللى عكس السير فيها لن يؤذى قطة... واللى خايف من الحبس ما يسوقش .. يعنى لازم تركبوا عربيات مالها التكاتك (مفرد توك توك ) يعنى ....

الجمعة، أبريل 24، 2009

فيروس سى لكل مواطن

لا تستغرب ولا تستعجب فقد تأكدت أننا فى بلد الشفافية والصراحة.....
سأسمع أصوات من أشخاص كثيرين .. تزيد عن الهمهمة وتقل عن معدل ريختر بنص درجة وقد يكون صدورها منهم فيه أحكام لمصدريها - بسبب كلامى - يستوجب معه حكم محكمة
ما علينا ...هتقول عليا مجنون - وايه الجديد - يا جماعة صدقونى طب شوفوا بس التصريح ده وأنتم تتأكدوا من كلامى .....
بتاريخ 23ابريل 2009
وزير الصحة: ٩ ملايين مصرى مصابون بفيروس «سى» النشط.. و٣٠٪ من المرضى يشفون لأسباب غير مفهومة
الخبر نقلا عن المصرى اليوم
ضحكت من أعماق قلبى بمجرد قراءة العنوان , وقلت أكيد الوزير مش وزير مصرى أكيد هندى .. لكن صورة الجبلى صدمتنى بوسامته وشياكته ..أكملت قراءة الخبر بالتفصيل الممل لقيت شوية نكت بجد تضحك ...
إسمع يا سيدى....
أعلن الدكتور حاتم الجبلى، وزير الصحة، أن أول مسح ديموجرافى لبيان أعداد المصابين بفيروس الكبد الوبائى «سى» كشف عن إصابة ٩.٨٪ من إجمالى السكان"؟؟؟؟.
يا نهار عشر الشعب عنده فيروس سى يا حلاوة فعلا....واكيد التسع أعشار الباقين بين سرطان وسل و قلب وسكر و....... ماشاء الله فعلا المصريين لسه بخير

وأعترف فى حواره مع الإعلامى خيرى رمضان ببرنامج «البيت بيتك» مساء أمس الأول بأن كل الدراسات والإحصاءات - التى كانت تستند إليها الوزارة من قبل - لم تتسم بالدقة،(يا نهار أسود امال هما بقالهم سنين يعملوا إيه .. يعنى كل الشغل كان غلط) ولم تتم فى سياق علمى، مما يجعلها غير مجدية (يعنى وهو ايه اللى مُجدى فى البلد أصلا )، ولا تصلح حتى للنشر فى الدوريات العلمية (علمية ايه بس يا عم جبالى ما تصلى على النبى)؟؟؟؟؟
استنوا ده لسه الزُبد جاى...

وأوضح الجبلى أن الوزارة شكلت لجنة قومية لمكافحة أمراض الكبد، ضمت ٧ متخصصين منهم ٥ مصريين وأمريكى وفرنسى

أدى اللى مش بحبه وكنت خايف منه .. لجنة قومية تانى .هى لو مش لجنة كنت إطمنت بس ما دام جت سيرة اللجنة يبقى عرفنا مصيرها ..يا عم دول لسه بيحققوا فى صفر المونديال بلجنة أبقى قابلنى - العنوان ما يتوهش اسأل انت بس- واللى قلقنى طبعا موضوع الاجانب أمريكى وفرنساوى .. دا الموضوع اكيد فيه اختلاف بين الدول الكبرى عشان كده
لم يكتفى الوزير بالكلام السابق .. أنما زاد الطين بلة وقال ...

«سنظل نعانى لمدة ٤٠ سنة مقبلة مع المجموعة المصابة بالمرض حتى نتمكن من القضاء عليه».
مش عاوز أتكلم تانى.. أسيبكم أنتم تتكلموا وتنفعلوا...أربعين سنة ايه يا عم الوزير ..وأنت طبعا هتكون فى الوزارة .. وهتيجى ساعتها وتقول إن الشغل مش كويس وإنك هتعمل لجنة لتقيم الوضع .......ياخوفى
عجبنى كمان تعليق أحد القراء على الموضوع
وأستطرد: «سنظل نعانى لمدة ٤٠ سنة مقبلة مع المجموعة المصابة بالمرض حتى نتمكن من القضاء عليه». أعتقد أن فترة الأربعين سنة هي العمر الأفتراضي للمرضى و بذلك يكون أخر الجملة "القضاء عليهم" و ليس "القضاء عليه" طريقة مصرية صرف للقضاء علي الأمراض وهي التخلص من المرضي و بالتالي نتخلص من المرض ...
والله عنده حق 40 سنة يكون الناس اتوكلت على الله وماتت وبكده نبقى خلصنا على المرض والله فكر جديد - شعار الحزن الوطنى بمعناه الحقيقى - حاجة تفرح بجد
أتمنى لكم جميعا الصحة والسلامة وربنا ما يحوجكم لحكومة زى حكومتنا

الخميس، أبريل 16، 2009

بنحبك حب الفرخة للديكا



ماحدش يفهمنى غلط انا مش اللى قلت الكلام ده اللى قاله هو رئيس وزراء مصر الاسبق على لطفى فى صالون غازى عوض الله الثقافى-فعلا يعوض الله علينا من اللى بنشوفه -فى مدح رئيس مجلس الشعب احمد فتحى سرور
مش كده وبس ده الشاعر -قصدى رئيس الوزراء السابق - قال شوية شعر حلمنتيشى فى تكريم احمد بك سرور مش عارف اقول عنه ايه طيب اسمعوا انتم واحكموا
فتحي سرور يا ويكا ... الكل يحبك حب الفرخة للديكا
لأن مصر دايمًا في قلبك.. ليس لها شريكا
أما حبك للقانون.. فهو في دمك وكلاويك
كلامك حلو وسكر.. وعامل زي المزيكا
نهضت بمجلس الشعب.. بُجهدك وعلي يديكا
طلبة الحقوق بيقولوا.. أستاذ قانون ناجح لما تعرف شغل البولتيكا
لست في حاجة إلي محام.. فمبادئك هي محاميك
دايمًا شاغل في قلبك.. همومك وشكاويك
ربنا يوفقك ويحميك.. يا فتحي يا ويكا
ما شاء الله على القافيه ورداءة الشعر الحلمنتيشى واللى زاد وغطى موضوع الفراخ والديك يا عم هى ناقصة دا مصر احتلت المركز التانى بعد الصين فى انفلونزا الطيور (ماشاء الله بقينا بنافس الصين فى حاجة )وفعلا اللى خلانى اقلق اللى كتبه فاروق جويدة (اننا لا نستحق هذا الوطن )لانى شايف ان احنا نستحق بس مش الوطن
نستحق وزراء ومسئولين متل على لطفى واحمد فتحى سرور قاعدين يغنوا لبعض على حساب الشعب وهما مثال للمسئول الحكومى المتميز -شكلى مش ناوى اجيبها لبر -عشان كده خلينا فى الفرخة والديكا
عشان كده احب اطمنكم ان حب الفرخة للديكا هو حب برىء وطاهر مافيهوش اى علاقة مريبة.احنا اهم حاجة عندنا سمعة الفراخ بتاعتنا........ وسلملى على الديكا

الجمعة، أبريل 10، 2009

السكان الاصليين لمصر- بلادة الحكام وطرمخة البشر




السكان الاصليين لمصر - حكايات عن عبقرية المكان وبلادة الحكام وطرمخة البشر
تاليف بلال فضل



استمتعت بقراءة الكتاب على مدى شهور من خلال مقالات الكاتب المتفرقة بجريدة الدستور الاسبوعية وازاددت متعتى عندما تم تجميع المقالات الخاصة بالكتاب والخاصة بالسكان الاصليين (وهم الفئة التى اسمها الكاتب او كما تعودنا انا نسمع او نقراء عنهم -المهمشون او محدودى الدخل اوالمواطن العادى –
الكتاب عبارة عن فصول منفصلة كل منها على حدى قصة تضحكك كما ستبكيك
لغة الكتاب شيقة وممتعة و مبكية على حد السواء باسلوب ساخر ممتع والكاتب استخلص مقالاته من اناس كان ومازال له احتكاك ببعضهم او معظمهم وهى شخصيات حقيقية او اسطورية (لن تستطيع ان تحدد) ومن اهم الشخصيات ام هند وعبدالله سيتا امبوسيبل و غيرها
الكتاب يصعب تلخيصه لاختلاف اتجاهات المقالات وتنوعها وتفرد كل منها بقصة شيقة والفصول تميزت بعناوين جذابة جدا ومن اهم الفصول (سيدى الرئيس اريد ان اهرش)و(القراءة للجميع اما الكتابة فللى معاه فلوس )و(وتعيش لنا للممات يا ريس يا قمرنا انت يا سكرة ) واهم مميزات الكتاب :
سهولة اللغة وتنوعها بين العامية والفصحى و مناقشة القضايا التى تمس محدودى الدخل والمهمشين بكل ماسيها واحلامهم البسيطة فى العيش المستور وافكارهم عن السكان المنتفين بمصر والشخصيات العامة المشهورة مثل جمال مبارك و احمد عز وغيرهم كما تميز بلغة سهلةوسلسة ذات معاني قوية وتميز باسلوب ساخر متميز ذو مذاق مختلف وبصمة فريدة تشعر معها كانك فى مكان القصة وانك ترى الشخصيات بتفاصيلها الدقيقة وكلما قرات ازددت معرفة بافكار الساكن الاصلى وطموحة ومشاكل حياته اليومية و الازمات الملمة به وشكاواه كما يحمل الكتاب بعض اراء الكاتب الشخصية عن الحياة اليومية فى مصر بصفته كان من السكان الاصليين لمصر حتى اصبح من السكان العاديين _متوسطى الدخل _ (باعترافه شخصيا) ومن اهم المميزات التى يتميز بها الكتاب هو كم الخبرات التى تكتسبها من خلال قصص الشخصيات والمواقف التى يسردها الكاتب وكذلك الافكار المتنوعة التى يطرحها الكتاب ومن اهمها هى صورة الشعب المواطن المصرى المغلوب على امره ومشاكله اليومية وقصصة المبكية المضحكة فى نفس الوقت
الكتاب يتميز برشاقة الحوار وسهولة التعبير بطريقة جذابة وشيقة الكتاب يعتبر توثيق لمصر الحديثة واعتبره كتاب وصف مصر والمصريين الاصليين (اشعر من كلمة الاصليين بانها تشبه السكان الاوائل لامريكا الشمالية –الهنود الحمر – وبالفعل السكان الاصليين كما وصفهم الكاتب يشبهوا الى حد كبير الهنود الحمر ولكنهم بالوان متعددة )
الكتاب لا يتبع ترتيب متسلسل لاحداث او فترة بعينها ولكن يتحدث عن اسلوب حياه اغلب المصريين والظروف الاجتماعية والاقتصادية الملمة بهم وباسرهم
الضحك المجروح هوالمسيطر العام على اجواء الكتاب الساخر الناقد لاحوالنا جميعا سواء الميسورين او المطحونين؛ انصح بقراءة الكتاب بشدة وخصوصا لمن يعانون من حالات فرح زائد او دائم ونصيحتى لا تقرا الكتاب قبل النوم عشان ما تنمش متعكنن
فى النهاية اشعر بان هذا الكتاب حالة فريدة من القراءة الساخرة
فالكتاب سياخذك الى عوالم جديدة تسبر فى اعماقها بدون ملل او رتابة او زهق
اتمنى ان يكون العرض الخاص بالكتاب يكون عند حسن الظن

من عرضى الخاص للكتاب مسابقة راديو حريتنا

الخميس، أبريل 09، 2009

كشرى مصر


صديق عزيز اخبرنى عبر الشات انه سمع ان فى دراسة بتقول ان الكشرى يحتوى على الالومنيوم
ضحكت من اعماق قلبى وفورا اخبرته ان صديقنا المحترف اكل كشرى زمانه بقى حلة من كتر الالومنيوم _اجبنى بسخرية اشد _ يا راجل يا حلة _ لم ازعل من المصطلح فهو دارج فى شلتنا واخبرته ان نص وزنه _ولامؤخذه الومنيوم_
حاولت تحليل الموضوع الفكاهى الذى اربكنى لانى اكلت كشرى بمعدل لا باس منه وما اعتقدش ان مافيش حد فى مصر ما اكلش كشرى بره بيته قلت فى نفسى ان دى مؤامرة _كالعادة تفكيرى وحش _من الحكومة انهم يخلصوا مننا وقلت فى بالى اهو اللى يخلصوا منه فى الكشرى ابو الومنيوم يعوضه المواليد الجديدة
برضوا ما هداليش بال وقلت لازم ادور فى النت على الموضوع ده كتبت فى البحث بتاع جوجل (كشرى)وقلت اما اشوف النتايج و لقيت نتايج تقلق اكتر
كشري : الهزيمة ترجع لفارق الخبرة والإمكانات لصالح الفراعنة_http://www.moheet.com/show_news.aspx?nid=175988&pg=36_ قولت فى بالى هى وصلت للفراعنة ادى اللى كنت خايف منه طبعا التعليق ده كان لكابتن احمد كشرى بتاع منتخب جيبوتى ؟؟؟ وواصلت البحث وخوفى بيزيد لغاية ما لقيت كشرى ابو طارق (اشهر كشرى فى مصر)والمفاجاة اطلب الكشرى على النت من ابو طارق عشنا وشوفنا كشرى من على النت اظن ان الراجل اللى اخترع النت لو يعرف اللى هنعمله من النت ان نطلب بيه الكشرى كان مات مولع فى نفسه
يالا ارزاق كل واحد بياخد نصيبه ..كملت بحث وتدوير طبعا معظم المواقع بتديك طريقة تحضير الكشرى واحسن وصفه ليه ايشى بالفراخ وايشى باللحمة _الله يرحم الكشرى بتاع زمان ابو بصل وحمص _هو برضوا الكشر ى مستويات هتقول ايه دنيا
اكملت البحث الى ان وجدت ان فى كتاب اسمه( كشرى مصر) فى هذه اللحظة عرفت ان مصر مرتبطة بالكشرى وان الموت علينا حق

رزق الهبل على المجانين

منتخب مصر الهمام بعد ما خلاص بقى فى منه امل وقلنا النحس اتفك ونلعب فى كاس العالم -ابقوا تفوا على قبرى _جه وخاب خيبة سوده واتعادل مع زامبيا على استاد القاهرة
وبعد الماتش سمعنا بقى على المشاكل بين اللا عبين شوية بين ميدو وعمرو زكى وشوية مش عارف مين وحش ومين حلو وده هيسيب النادى الفلانى وده هيروح النادى العلانى وده بياخد كام فى الاسبوع -الواحد مش كان فلح وطلع لعيب كورة_ادى اخرة متابعة الواحد للكورة هما ياخدوا على قلبهم فلوس واحنا _ناخد برضوا _بس حرقة الدم ووجع القلب فعلا رزق الهبل على المجانين