جبر خواطر

يبدو اننى انحت فى الصخر, هكذا اقول لنفسى دائما بعد ان ارى مدى الاهتمام بالمقالات التى اكتبها , وردود الافعال حول افكارى وافكار من حولى , فدائما ما تكون كتاباتى تعبيرا عمن حولى اكثر من تعبيرى الذاتى بأحوالى وهمومى و افكارى , فمجموع من يقرأ لى اغلبهم من اللذين يقتنعون بى شخصيا , وقد اكون مخطئا ان قلت انهم قد اكتشفوا موضوع اهتمامى بالكتابة بالصدفة , ويتابعوننى من باب الشفقة ومن باب جبر الخواطر .
دائما ما اتحسر عندما اشاهد ردود - كومنتات - الاشخاص على تعليق اى فتاه -خصوصا فى الفيس بوك - , واغلب الردود من الشباب طبعا , مثلا : البنت ( ايا كان اسمها او شكلها او تجاوبها مع المحيطين بيها وايا كان استجابتها للردود ) تكتب مثلا ....... مخنوقة !!!!!
انظر الى كم الردود والذى يتخطى الاربعين ردا او يزيد - ومعظمها من الشباب كما اكدت - فمن يقول لها : سلامتك من الخنقة , من ايه يا قمر , و ...... لا... كله الا انتى يا قمر , انا زعلان جدا انك مخنوقة واتخنقت لخنقتك , ولا تنتهى الا برد او اكثر من صاحبة التعليق بردود اكثر سخافة من اللى كتبوا ليها .
فعلا شعب يجرى ورا اى شىء مؤنث بدءا من عربة رش الناموس - طبعا العربية مؤنث - وانتهاءا بمطاردة اى فتاه فى اى مكان حتى ولو كان الانترنت , لا انكر عن نفسى انى من نفس الفئه ولكنى اقل بكثير فى الحماقة والسخافة فى التعليقات سواء على ولد او بنت ,
لدى صديق ذو خواص انجذابية خارقة , فبمجرد رؤيته لاى فتاه يعجب بها يبدأ فى القاء شباكه تجاهها سواء كانت من النوع القابل للانجذاب او النوع الطارد للاخرين , ولو كانت من النوع الاول فتجده فتح سكه معها بحوار لطيف وذوق و رقيق وشيك وكل الحاجات اللى تخدع بيها اى بنت , وغالبا ينتهى التعارف الاولى فى مكان ما – غالبا مطعم لان صاحبى همه على بطنه – و تعارف ونمر موبايلات و ...... الخ
اما ان كانت من النوع الثانى الطارد للاخرين ,فلا يفقد رزالته او غتاته مهما تعرض من اهانات فى كرامته ,الا عندما يتأكد انه ممكن يتحبس لو كمل فى طريقته , فيبدأ بوقف محاولات الصيد ويذهب لمنطفة اخرى مليئة بالاسماك , وعلى رأيه دائما ( البحر مليان سمك ) ,
فى الفترة الاخيرة عملت مقارنة بسيطة بين المتابعين لاى مدونات نسائية ومدونات شبابية , فوجدت ان الاهتمام بالمدونات النسائية ينصب اغلبه على المتابعين من الشباب والعكس بالعكس
وده لايخرج عن قانون الطبيعة الثابت و الدائم وهو الانجذاب المتبادل او الانجذاب للجنس الاخر.
لا انكر وجود مدونين شباب يتابع لهم القاصى والدانى من الجنسين , لجودة ابداعاتهم وتميزها بافكار جديدة واسلوب عرض متميز , واتمنى اكون منهم
..... لكن دائما لكل قاعدة شواذ !!!!

ثروة 23 يوليو !!!!

نعم انت لم تخطىء قراءة العنوان , اينعم ثروة وليست ثورة 23 يوليو , فبحلول يوم 23 يوليو الحالى كانت احلامى كلها تتمثل فى ان يكون لدى ثروة تتجاوز ارقامها العشرة اصفار – او على الاقل ثمان اصفار – ولكن يبدو انى مازلت افضل من الحمار لا احمل اصفارا ( مع اختلاف نوعية الاصفار ) , ويبدو انى سأنتظر طويلا ل 23 يوليو لا اعلم بالتحديد فى اى عام والاحتمال الارجح انى حلمى البسيط بالتسع اصفار - مش عاوز اسمع حد يعلق ويقولى انت قلت عشرة , واضح انك مركز والقلم ياما بيغلط !!!!- لن يتحقق ولا بعد ملايين السنين الضوئية , فالثورة كما قضت على الاقطاع والاقطاعيين , جاءت اخرى غيرها لتبنى جيلا جديدا من الاقطاعيين ولكن بلوك جديد ولكن لا اعتقد ان هناك ثورة ستخلصنا منهم كثورة يوليو52 !!!!!
ذكرياتى الدائمة مع الثورة لا تتعدى افلام فى بيتنا رجل والايدى الناعمة و الفيلم الخاص بعلى وانجى ذو الافيه المشهور ..... انت من الاحرار ياعلى , وكل ظنى ان (على ) غير مهتم حاليا غير بقضاء اجازته الصيفية فى مارينا , ولا يولى من الحرية غير التحرر من الحد الاقصى من ملابسه للاستمتاع بالشاطىء والبحر والاجواء الصيفية امام شاليه حصل عليه بعد الثورة تقديرا لمجهوداته فى التخلص من الاقطاع والاقطاعيين .
اتوقع ردودا كثيرة لمحبى جمال عبد الناصر – وانا منهم - ومهاجمة شرسة ويمكن ان يصل الموضوع الى الشتائم والسباب ويمكن ان تصل الاتهامات الى حد اننى شيوعى او علمانى او ليبرالى و قد يصل الامر الى حد الالحاد ...... , لاننى تجرأت وتطاولت على الاشتراكية والناصرية والثورة , وان السادات – على فكرة بحبه برضوا - هو السبب فى الوضع التى وصلت اليه البلد , وللخروج من هذا الوضع الشائك احب ان اوضح ان الموضوع لا يخص شخص بعينه او تيار او فكر سياسى من علمانية او ليبرالية او شيوعية او .......غيرها من التيارت الفكرية والسياسية التى بينها جدال دائما - رغم معرفتى المحدودة فى الاختلافات بينهم – ولا احب ان يتهمنى احد باى تهمة بانتمائى لتيار محدد لانى غير ملم بكل منهم , فكل الحكاية انى حبيت اتذكر مع نفسى ذكرياتى لثورة يوليو ولكن بوجهة نظر مختلفة ,
ملحوظة لوجه الله
ارجوكم لا تتركوا صلب الموضوع وتركزوا فى (على) زى المرة اللى فاتت الناس سابت العملة المعدن ومسكت فى تامر حسنى عشان قلت رائى فى الاغنية المبجلة بتاعته فهمى نظمى رسمى ......

افلاس فكرى ...... وشوقى لو تحبى !!!!!!!

دائما ما يصاب الكاتب او المفكر بنوع من الافلاس فى الافكار , وهو ما يطلق عليه بشكل ادبى بالافلاس الفكرى , وعلى رأى اغنية تامر حسنى فهمى نظمى رسمى - تفاهه مطلقة رغم اعجاب ناس كتير بيها وبكلمتها العجيبة - اللى بيقول فيها تقريبا ...... انتى اللى مسيطرة على بالى على فكرى ...... وشوقى لو تحبى ....... فعلا كلام هادف جدا .
بمجرد احساسى بهذا الشعور الصادم بالافلاس الفكرى انتابتنى حالة من الاكتئاب – طبعا انا طوال الوقت بكتئب بس بدور على اى سبب للاكتئاب – وبدأت اعصر دماغى عن فكرة جديدة يكون لها صدى مواضيعى السابقة - ومن كتر العصر فى دماغى يبدو ان العصارة الالكترونية باظت فقلت اعصر يدوى يمكن يكون فى امل - , ويبدو ان شياطين الكتابه – زى الوحى او الالهام كده اللى بيسميه الكتاب الكبار بس انا عندى للاسف الشياطين هى اللى بتوزنى للكتابة – قررت فجأة امدادى بالفكرة الجديدة ووجدت عصير من الافكار الغزيرة – يبدو ان العصر اليدوى جاب نتيجة !!!!- تنساب الى رأسى .
الموضوع المعصور – نسبة الى الطريقة التى جاءت بها الفكرة - كان عبارة عن موضوع العملات المعدنية الجديدة ذات الفئات المتعددة بدءا من العشر قروش وانتهاءا بفئة العشرة جنية المعدن, وقد يستغرب البعض من الموضوع اذا كان من ساكنى القاهرة والاسكندرية لانهم يتعاملوا بهذه العملات المعدنية من فترة ولم يشتكى احد , لكن محافظتنا المتميزة بكل جديد يرفض فيها اى احد التعامل بالعملة المعدن عدا الربع الجنية المخروم - بلاش تفكيرات قليلة ادب - , واذا راودتك نفسك انك تطلع الفلوس المعدن فى وجه اى شخص تتعامل معه ماليا
هتلقيه يقولك " ايه ده يا استاذ .... لا ما بتمشيش معانا دى , شوفلنا حاجة ورق "
ولا كأنك بتشحت منه او عاوز تنصب عليه بعمله معدنية من زمن الخديوى توفيق , وتجده ينظر ليك نظرات مريبة يملأها الشك فى كونك نصاب مخضرم , ويكون اعتقاده الراسخ انك عاوز تنصب عليه فى المبلغ المعدنى , والذى لا يتجاوز الجنية على اقصى تقدير - بيروح فين الذكاء ده فى عمليات النصب على المصريين التى تتجاوز فيها الارقام الورقية الملايين من الجنيهات -, مؤخرا اوقعنى حظى العاثر فى مبلغ معضل بالعملة المعدنية- 10 جنية تقريبا – وكان المبلغ ضمن فلوس استحقها فى الشغل , وحسيت بفجاعة الرقم اللى هيضيع منى ومش هعرف اصرفه , لكن كان رد من حولى ان البنوك بتفرض على الجميع الفلوس المعدن عند تحصيل اى مبلغ منها , وان الحكومة قررت ان اى حد يرفض يتعامل بيها , ما عليك الا انك تتصل بالنجدة و تقولهم يجوا يعملوا محضر للى بيرفض يتعامل بيها ويجبروه ياخدها منك كمان.
لكن البداية كانت فى القهوة , وفكرت احاسب بالعملة المعدن , الا ان المفاجأة كانت ان القهوجى رفض اخد المبلغ المعدنى وبنفس الطريقة " ما بتمشيش معانا , ولو عاوز اتصل بالنجدة , انا مستنى ......" طيب بذمتكم اقوله ايه , طبعا احرجت وطلعت الفلوس الورق وقلت اقصر الشر والراجل مش غريب علينا , ومش طالبة مشاكل على اخر السهرة ,
فجأة وجدت نفسى مضطرا لحساب السايس اللى مسح العربية وما لقتش معايا غير الفلوس الملعونة , وبدأت الم من صحابى فلوس ورق وابدلها بالمعدن ومنهم من يرفض بزوق ويقولى ياعم عادى خليها هعمل بيها ايه , وصديقى اياه الحريص - واللى انا بسميه دايما ميت على القرش - يقولى " ودى انا هعمل بيها ايه ما بتتصرفش ...." ما تقولش يعنى اخدت منه ميت جنية , ما كنش جنية اعمى اللى هيعيط عليه , وقعدت افهم فيهم ان العملة الورق هتتلغى قريبا وان العملة الورقية لن يتم التعامل بيها , الا انى اشعر ان الجميع غير مقتنع .
وما ان وصلت للسايس الا وحبيت اهزر معاه وقولتله " تاخد الفلوس معدن ولا ورق "
اجابنى بكل ثقة " ورق طبعا ..... واللى ما يرضاش ياخد منك معدن كلمله النجدة ونمرتها 122 .......... " !!!!!!! اذهلنى رده فتراجعت عن موقفى فى الدفع بالمعدن و توقفت عن شرح موضوع الغاء العملة الورقية , وانطلقت بالعربية ورميت فيها كل الفلوس المعدن , وناويت بينى وبين نفسى اجرب طريقة جديدة كتجربة للتخلص من الفلوس المنحوسة وهى انى اول حد بيشحت هديله الفلوس المعدن واشوف رد فعله , وفعلا اول حد قابلنى اديتله المعدن وبصيت لقيته اخدها وما اتكلمش رغم توقعى انه يقولى نفس الرد انها ما بتمشيش معاه الا انى لاحظت انه بصيلها بصة جامدة ومتفحصة ليتأكد من كبر المبلغ بدل ما يطلع 10 قروش !!
قلت الحمد لله لقيت سكة اقدر اخلص بيها من الفلوس المعدن , وبينى وبين نفسى دعيت على اللى اخترع فكرة المعدن, وقررت ادور فى الاسباب وراء الموضوع ده , ولقيت كل التصريحات بفكرة العملات المعدنية الجديدة بتنحصرفى تقليل تزوير الفلوس وتوفيرا لتمن الورق اللى بيتبهدل واعادة طباعة غيره والجديد فى الموضوع بيقولوا ان المعدن كمان لا ينقل انفلونزا الخنازير !!!!!
الغريب فى الموضوع ان الناس واخدة الموضوع بصورة تريقة , وكل واحد يقولك احنا نشيل المعدن فى صرة , ونتعامل بصره من الدنانير , وبكم تشترى هذا العبد ؟؟؟؟ وبكده نكون رجعنا لعصر الجاهلية الاول ايام ابو جهل – الله يحرقه بجاز وسخ -
فعلا بلد فهمى ....... نظمى .............. رسمى ,, وشوقى لو تحبوا !!!!!!!!

مدونة عربى............... ام الاجنبى

احمد الله كثيرا ان هناك احد مهتم بقراءة ما اكتب , فمنذ بدأى فى التدوين وانا دائما اشعر ان معظم المهتمين بكلامى هم من فى دائرة المحيطين بى , ومنهم بالتأكيد اصدقائى والذين دائما يتابعونى غصبا عن ارادتهم باحراجهم بكل ادب وزوق منى باخبارهم بانتظارى لاراءهم مما يضطرهم للمتابعة الاجبارية - زى التجنيد الاجبارى كده - , لكن مؤخرا اكتشفت ان هناك زوار لا اعرفهم شخصيا ينتظروا مقالاتى , ويخبرونى بكل حب عن سر توقفى لفترة عن الكتابة فى المدونة وانهم ينتظروا منى الجديد , لذلك قررت العودة من جديد ؟؟؟ مش هقول غير جبتوه لنفسكم !!!!!
ملحوظة :
المقدمة طويلة وسخيفة لكن لابد منها , وعارف ان فى ناس كتير زمانها قفلت البلوج ,خصوصا انها كمان بالفصحى - ماتقولش يعنى فصيح اوى فى اللغة !!!! - ولو لسه مصمم تقرا يبقى ذنبك على جنبك فعلا , خلاص ندخل فى الموضوع عشان الحر مش ناقصة اصلا ........
الاصدقاء ...... لعنهم الله واهلكهم كما يهلكونى دائما من الضحك , وكما اعتدت دائما ان افضحهم – وافضح نفسى كالعادة – فقررت انى اجمع اطرف المواقف التى جمعتنى بيهم الفترة اللى فاتت , لن انسى صديقى ذو الشعر الكثيف والذى يتفوق على تامر حسنى فى كثافة شعره وغزارته , و الذى كثيرا ما نعايره بانه الحلقة المفقودة بين الانسان والقرد - طبعا هو نادرا ما يزعل مننا لطيبة قلبه الشديدة للدرجة التى تصل لحد السذاجة – فهو يتميز بتلقائية شديدة فى اسئلته التى تصل فى احيان كثيرة الى مرحلة العبط لكنها مميته من الضحك , لن انسى يوم ما سأل احد اصدقائنا عن احد زراير اللاب توب بتاعى , وقلتله فورا دى عشان البصمة بس مش بستخدمه , قالى فورا اه عشان لو صابعك اتقطع مش هتعرف تفتح اللاب توب - مش هقول غير حسبى الله ونعم الوكيل - واجابه صديق اخر من الحاضرين "ياعم كل الصوابع بصمتها شبه بعض ... يعنى لو اتقطع واحد ممكن يفتح بواحد تانى " ولحسن الحظ كان معانا احد اصدقاءنا من عملاء النظام – ضابط شرطة يعنى – وفورا قاله" انت هتفتى .... هو انت خريج شرطة " , وطبعا صاحبنا اللى عاوز صباعى يتقطع قاله بغلاسة " اه " , فما كان من صاحبا كثيف الشعر انه سأله بكل براءه
" انت شرطة عادى ولا ازهر ؟!!!!!!!! ......"
لم نكتفى جميعا بالاستلقاء على ظهورنا من الضحك الهستيرى الذى كاد ان يفقدنا الوعى من كثرة الضحك والالام عضلات الفك التى كادت ان تتمزق من كثرة الضحك , ولم يمر اليوم بسلام على موقف صديقنا من موضوع شرطة الازهر , فاستكملنا الحوار بعد فاصل من النهجان ولا كأننا جرينا 150 كيلو عدو - او فراشة زى السباحة – الا وفوجئنا بصديقنا اياه صاحب موضوع قطع صابعى وهو بيقولنا بشكل علمى منظم ان فى احصائية بتقول اننا بحلول عام 2013 مش هيبقى عندنا مشكلة بطالة , طبعا كلنا بصينا بدهشة شديدة وتوقعنا انه انضم للحزب الوطنى قريب , لكنه واصل كلامه بشكل مفاجىء وقال ان فى احصائية بتقول ان المشكلة هتكون مش فى عدد الشباب العاطل , انما المشكلة هتكون فى عدد الكراسى فى القهاوى !!!! , مش عاوز حد يتعصب او يتنرفز من اصحابى دول انا غلطان انى حكيت من الاول , واعتذر لاى حد ما عجبوش كلامهم , بس الغلطة غلطتك انك لسه ما قفلتش البلوج !!
من خلاصة تجاربى مع اصدقائى انصحكم ما حدش يفكر يقعد معانا الا وهو واخد مصل مضاد للضحك , لان ممكن اى حد ينضم لينا لاول مرة يجيله سكتة قلبية من كتر الضحك !!!!!
اخيرا اتمنى ان تكون عودتى مرة تانية ما جابتش وجع دماغ للناس ومش هقول غير زى اعلان ميلودى السافل
" الفاضى يعمل قاضى.. مدونة عربى............... ام الاجنبى "

عرضى لرواية عزازيل فى مجلة كلمتنا عدد شهر يوليو 2009

كل الشكر لشيماء الجمال ولمجلة كلمتنا















ملحوظة : لمشاهدة المقال بشكل اوضح يرجى الضغط على صورة المقال

خمسين !!!!!!!!!!!!!

بمجرد نزول اعلان فودافون بتاع ( خمسين ) , شعرت انها نصاباية جديدة من الشركة الموقرة التى احمل لها خطين رغما عنى - واحد بارادتى والتانى خط بدون ارادتى خاص بالشغل - ورغم قناعتى الخاصة بجودة خدمة فودافون بالمقارنة بموبينيل - ام نبيل ده الاسم الحركى للشبكة - الا ان موضوع الخمسين اللى اتقال فى الاعلان لم يتجاوز تفكيرى فيه سوى ان يكون عرض جديد من عروض فودافون الخايبة , وكان اقصى طموحى ان تكون النصف ساعة بخمسين قرش – يا بلاش يا بلاش - , هكذا كان تفكيرى المحدود والضيق والظالم فى نفس الوقت , فبمرور كام يوم ظهر الحق , وطلع الموضوع اكبر من 50 قرش وتخطى حاجز خيلاتى المحدودة , فالشركة قررت انها تعطى 50 عربية بى ام دبليو هدية لخمسين فائز , وبدون اشتراك فى خدمة معينة او الاتصال برقم , او ارسال رسالة فاضية لاى نمرة , يعنى بالبلدى كل اللى عنده خط فودافون يبقى دخل فى المرشحين للفوز- فى سرى قلت كويس انا معايا خطين يعنى فرصتى كبرت وتراجعت عن موقفى من الخطين فجأة - , بس طبعا فرصتك تزيد كلما اتكلمت اكتر او شحنت اكتر او ...... اى حاجة اكتر من غيرك .
وكلما قابلت صديق اخبرته بانى معشم اخد العربية البى ام دبليو , وابيعها واعيش من ريعها ,فقد كنت اتصور انها تتجاوز ال300 الف جنية , الا ان صديقى الخبير بأمور العربيات - واللى دايما يقولى انه ركب عربيات عمرى ما احلم بيها ورغم ان سواقته للسيارات لا تتعدى حدود سواقة الفلاح للجرارات للحرث فى الارض الزراعية - قالى بكل اسف ان العربية بتاعت فودافون لن تتجاوز 140 او 160 الف جنية كاقصى تقدير , وطبعا الاحباط بدأ يتملكنى وحسيت بالخيانة حتى الجايزة مستخسرين فيه مبلغ يتخطى الربع ارنب - ما تقولش يعنى كسبت - وشكيت فى كلام صديقى لانه من اصحاب خطوط الموبينيل العتيقة وممكن يكون عاوز يحسسنى بعدم اهمية الموضوع عشان هو طبعا مضايق انه مش فودافون , لكن بالرغم من صدمة تمن العربية مازلت متعلق بامال المكسب , واقول اكيد هيكلمونى فى فودافون بكرة
" مساء الخير ...... حضرتك شر ....... صاحب الخط رقم 01069..... واجيب فورا : ايوة , مبروك يافندم حضرتك كسبت من فودافون عربية بى ام دبليو , وحضرتك تشرفنا فى اى وقت تستلم العربية , ياريت تجيب معاك البطاقة وحضرتك جاى ....... شكرا لاتصالك بفودافون مصر " توت توت ... ...طبعا ده صوت الخط بعد ما يتقفل وانا بتنطط زى العيال الصغيرة من الفرحة بمكسبى واجرى اقولهم فى البيت انى كسبت , لكن فجأة اعود من خيالى الى ارض الواقع واتذكر مدى حظوظى القليلة فى المسابقات , وانى من النادر ان اكسب فى اى مسابقى تعتمد على القرعة !!!!!!
وفجأة وجدت كل من حولى يخبرنى بأن فرصته كبيرة فى الفوز بالسيارة ,و ان فودافون بعتتله رسالة انه دخل المسابقة كام مرة - يا نهار دا انا مافيش ولا رسالة جاتلى ...يا خبتى القوية - وصديق تانى يخبرنى برقم فاتورة موبايله والتى تجاوزت ال3 الالاف جنيها , ولا يتضايق من رقم الفاتورة رغم كبر المبلغ , وبكل برود يقولى اهو فرصتى فى الفوز بالبى ام دبليو تكتر , وانا اللى كنت معشم على انى افوز ؟؟؟ ......فعلا المنحوس منحوس ..... ولو كانوا 50 عريبة من فودافون !!!!!!

تشابه اسماء

أعتز جدا باسم الشهرة الخاص بيا واللى بيتكون من اسمى الاول ولقب العيلة , واتعودت دايما تقديم نفسى بيه , كأنه اسم لقائد حربى شهير مثل صلاح الدين الايوبى , مين منا هيعرف ان المقصود هو القائد العظيم بدون لقبه ( الايوبى ) فهناك الالاف بل الملايين من الذين يحملون اسم (صلاح) , فى بداية حياتى المدرسية كنت لا افضل انا ينادينى اصدقائى بلقبى لانهم كانوا يستسهلوا و ينادونى باللقب فقط بدون اسمى , وكنت وقتها معتزا بأسمى بدون اللقب , يمكن كان عندى عقدة انى ابقى مضاف الى لقب - تقريبا كده لانى مش كنت شاطر اوى فى النحو خصوصا موضوع المضاف والمضاف اليه - و يمكن كنت محتاج اخرج من عباءة والدى - زى عبد الغفور البرعى كده فى مسلسل لن اعيش فى جلباب ابى - ويمكن لان معظم زمايلى فى المدرسة كنت متوقع انهم ما يعرفوش اسمى الاول وخفت ينسونى ساعة ما ياخدوا الغياب لانهم مش عارفين اسمى بالكامل , فكل اللى يعرفوه عنى لقبى , وبكده ممكن اتاخد غياب اونطة لو ما كنتش مركز معاهم وقت الغياب .
الموضوع ده بدأ يتلاشى بالتدريج من وقت الانتقال من اعدادى لثانوى , لان عدد اصدقائى اللى انتقلوا معايا قل , وكمان فى زمايل جداد , حاولت جاهدا انى اقولهم اسمى بدون القاب , لكن بالرغم من كده لم انجح فى انى ارسخ اسمى بدون اللقب والفضل يرجع لصحابى القدامى اللى كانوا مصممين ينادونى بلقبى .
فى الكلية اخيرا نجحت فى انى ارسخ اسمى بدون القاب لان عدد اللى دخلوا كليتى كان تقريبا لا يتعدى اصابع اليد الواحدة , لكن اكتشفت بعد فترة من نهاية الكلية ان اللقب مهم جدا فى حياة الانسان , وانه كمان كان مميز ليا بين زمايلى اللى ليهم نفس الاسم الاول , وده خلانى ابدأ اعيد بناء اللقب من جديد , وبقيت مصمم انى اقول لقبى زى اسمى - بدون تخاذل- لاى شخص جديد اتعرف عليه فى اى حته يكون فيهما مجال للتعارف.
مؤخرا عملت بحث على موقع جوجل عشان الاقى الناس اللى مشتركة معايا فى نفس الاسم , فوجدت ان البحث ما توصلش الا لملفات تعريف لا تخصنى لناس تتشابه معايا فى نفس الاسم و استوديو فى القاهرة يمتلكه واحد له نفس اسمى وكان حريص انه يحط موقعه على خرائط جوجل, اهو فرصة يمكن نتصور عنده ببلاش لما يعرف موضوع التشابه فى الاسم و يمكن يكون ليا فى الورث كمان واخدلى بيهم كام صورة وكام كاميرا و كام شريط افلام .
والجميل فى الموضوع ان احد اصدقائى كان بيضفنى للفيس بوك لفت نظرى الى انه لما دور عليا , اكتشف وجود حوالى 25 شخص ليهم نفس الاسم باللقب , وكان حظه كويس انى كنت حاطط صورتى .
طيب اعمل ايه دلوقتى , سواء حافظت على اللقب او ما حفظتش عليه فى لخبطه , اعتقد انى عندى فكرة كويسة اوى عشان اللخبطة وهى ان الشخص يبقى اسم ولقب و 3حروف و 3 ارقام زى نمر ملاكى مصر !!!!

صحيح نسيت اقولكم اسمى ........ ولا بلاش عشان ما لخبطكوش معايا , وعشان ما تحتاروش تنادونى بلقب ولا بدون .!!!!!