الخميس، يوليو 16، 2009

افلاس فكرى ...... وشوقى لو تحبى !!!!!!!




دائما ما يصاب الكاتب او المفكر بنوع من الافلاس فى الافكار , وهو ما يطلق عليه بشكل ادبى بالافلاس الفكرى , وعلى رأى اغنية تامر حسنى فهمى نظمى رسمى - تفاهه مطلقة رغم اعجاب ناس كتير بيها وبكلمتها العجيبة - اللى بيقول فيها تقريبا ...... انتى اللى مسيطرة على بالى على فكرى ...... وشوقى لو تحبى ....... فعلا كلام هادف جدا .
بمجرد احساسى بهذا الشعور الصادم بالافلاس الفكرى انتابتنى حالة من الاكتئاب – طبعا انا طوال الوقت بكتئب بس بدور على اى سبب للاكتئاب – وبدأت اعصر دماغى عن فكرة جديدة يكون لها صدى مواضيعى السابقة - ومن كتر العصر فى دماغى يبدو ان العصارة الالكترونية باظت فقلت اعصر يدوى يمكن يكون فى امل - , ويبدو ان شياطين الكتابه – زى الوحى او الالهام كده اللى بيسميه الكتاب الكبار بس انا عندى للاسف الشياطين هى اللى بتوزنى للكتابة – قررت فجأة امدادى بالفكرة الجديدة ووجدت عصير من الافكار الغزيرة – يبدو ان العصر اليدوى جاب نتيجة !!!!- تنساب الى رأسى .
الموضوع المعصور – نسبة الى الطريقة التى جاءت بها الفكرة - كان عبارة عن موضوع العملات المعدنية الجديدة ذات الفئات المتعددة بدءا من العشر قروش وانتهاءا بفئة العشرة جنية المعدن, وقد يستغرب البعض من الموضوع اذا كان من ساكنى القاهرة والاسكندرية لانهم يتعاملوا بهذه العملات المعدنية من فترة ولم يشتكى احد , لكن محافظتنا المتميزة بكل جديد يرفض فيها اى احد التعامل بالعملة المعدن عدا الربع الجنية المخروم - بلاش تفكيرات قليلة ادب - , واذا راودتك نفسك انك تطلع الفلوس المعدن فى وجه اى شخص تتعامل معه ماليا
هتلقيه يقولك " ايه ده يا استاذ .... لا ما بتمشيش معانا دى , شوفلنا حاجة ورق "
ولا كأنك بتشحت منه او عاوز تنصب عليه بعمله معدنية من زمن الخديوى توفيق , وتجده ينظر ليك نظرات مريبة يملأها الشك فى كونك نصاب مخضرم , ويكون اعتقاده الراسخ انك عاوز تنصب عليه فى المبلغ المعدنى , والذى لا يتجاوز الجنية على اقصى تقدير - بيروح فين الذكاء ده فى عمليات النصب على المصريين التى تتجاوز فيها الارقام الورقية الملايين من الجنيهات -, مؤخرا اوقعنى حظى العاثر فى مبلغ معضل بالعملة المعدنية- 10 جنية تقريبا – وكان المبلغ ضمن فلوس استحقها فى الشغل , وحسيت بفجاعة الرقم اللى هيضيع منى ومش هعرف اصرفه , لكن كان رد من حولى ان البنوك بتفرض على الجميع الفلوس المعدن عند تحصيل اى مبلغ منها , وان الحكومة قررت ان اى حد يرفض يتعامل بيها , ما عليك الا انك تتصل بالنجدة و تقولهم يجوا يعملوا محضر للى بيرفض يتعامل بيها ويجبروه ياخدها منك كمان.
لكن البداية كانت فى القهوة , وفكرت احاسب بالعملة المعدن , الا ان المفاجأة كانت ان القهوجى رفض اخد المبلغ المعدنى وبنفس الطريقة " ما بتمشيش معانا , ولو عاوز اتصل بالنجدة , انا مستنى ......" طيب بذمتكم اقوله ايه , طبعا احرجت وطلعت الفلوس الورق وقلت اقصر الشر والراجل مش غريب علينا , ومش طالبة مشاكل على اخر السهرة ,
فجأة وجدت نفسى مضطرا لحساب السايس اللى مسح العربية وما لقتش معايا غير الفلوس الملعونة , وبدأت الم من صحابى فلوس ورق وابدلها بالمعدن ومنهم من يرفض بزوق ويقولى ياعم عادى خليها هعمل بيها ايه , وصديقى اياه الحريص - واللى انا بسميه دايما ميت على القرش - يقولى " ودى انا هعمل بيها ايه ما بتتصرفش ...." ما تقولش يعنى اخدت منه ميت جنية , ما كنش جنية اعمى اللى هيعيط عليه , وقعدت افهم فيهم ان العملة الورق هتتلغى قريبا وان العملة الورقية لن يتم التعامل بيها , الا انى اشعر ان الجميع غير مقتنع .
وما ان وصلت للسايس الا وحبيت اهزر معاه وقولتله " تاخد الفلوس معدن ولا ورق "
اجابنى بكل ثقة " ورق طبعا ..... واللى ما يرضاش ياخد منك معدن كلمله النجدة ونمرتها 122 .......... " !!!!!!! اذهلنى رده فتراجعت عن موقفى فى الدفع بالمعدن و توقفت عن شرح موضوع الغاء العملة الورقية , وانطلقت بالعربية ورميت فيها كل الفلوس المعدن , وناويت بينى وبين نفسى اجرب طريقة جديدة كتجربة للتخلص من الفلوس المنحوسة وهى انى اول حد بيشحت هديله الفلوس المعدن واشوف رد فعله , وفعلا اول حد قابلنى اديتله المعدن وبصيت لقيته اخدها وما اتكلمش رغم توقعى انه يقولى نفس الرد انها ما بتمشيش معاه الا انى لاحظت انه بصيلها بصة جامدة ومتفحصة ليتأكد من كبر المبلغ بدل ما يطلع 10 قروش !!
قلت الحمد لله لقيت سكة اقدر اخلص بيها من الفلوس المعدن , وبينى وبين نفسى دعيت على اللى اخترع فكرة المعدن, وقررت ادور فى الاسباب وراء الموضوع ده , ولقيت كل التصريحات بفكرة العملات المعدنية الجديدة بتنحصرفى تقليل تزوير الفلوس وتوفيرا لتمن الورق اللى بيتبهدل واعادة طباعة غيره والجديد فى الموضوع بيقولوا ان المعدن كمان لا ينقل انفلونزا الخنازير !!!!!
الغريب فى الموضوع ان الناس واخدة الموضوع بصورة تريقة , وكل واحد يقولك احنا نشيل المعدن فى صرة , ونتعامل بصره من الدنانير , وبكم تشترى هذا العبد ؟؟؟؟ وبكده نكون رجعنا لعصر الجاهلية الاول ايام ابو جهل – الله يحرقه بجاز وسخ -
فعلا بلد فهمى ....... نظمى .............. رسمى ,, وشوقى لو تحبوا !!!!!!!!

هناك تعليقان (2):

Mona يقول...

الموضوع ده برضة بيغظنى بس أنا بتخانق مع الناس الى مش بترضى تخدها لانها حاجة مستفزة أنا بأشترى به الجرنال كل يوم أختى عايشة فى الغردقة بتقول لى أن محدش بيرضى يخدوه خالص عندهم قلت لها خلاص أنتى كمان ما تخديهوش من أحد - أنا سمعت أنهم حيعملوا عملة معدنية ب5 جنيه - علشان لو ماكانش عجبك الجنيه يبقى جالك ابو خمسة وسلملى على شوقى وأنت جاى ومالاقيش معاك فكة بس ورق؟؟؟!!!

شريف القاضى يقول...

مدام منى : معايا بقية العشرة جنية بس معدن , وشوقى بيسلم عليكى جدا .....