المرة الاخيرة

انها المرة الاخيرة التى سوف ترتدى فيها قميصك الازرق المميز ..
لم تنسى فرحتك الاولى بشراؤه ..
والتى خشيت بعدها من إرتداؤه لمدة تزيد عن العشر أيام خوفا من الكرمشة ..
جلستك المتحفزة خوفا من تقافز فحم الشيشة من الشياش المتهور ..
ترقبك لتعليقات زملائك عنه ..وتقيم سعرة مقارنة بجودته ..
موعدك الاول به معها ...
صورتك به التى وضعتها كصورة بروفايل الفيس بوك ..
انها المرة الاخيرة ..

***

الصفحة الاخيرة من تلك الرواية التى كنت متشوق لقرائتها ..
لهفتك الاولى عند شراءها ..
تأنيب والدتك لشراء الكتب المستمر الذى يضيع أغلب فلوسك ..
الكلمة الاخيرة التى وقعت عليها عيناك قبل أن تغرق فى نوم عميق ..
(غدا)
لم تلتفت للمعنى الخفى للكلمة حينما استيقظت ..
لم تدرك أن غدا ..
هو يومك الاخير ..

***

لم تهتم أبدا بفارق الدقائق بين 5:54 و 55 5: مطلقا ..فكلاهما يقرب للساعة السادسة ..
أخر مرة مرت عليك الساعة 5:55 مساءا (كانت أمس )
لم تهتم ..
مكتوب فى قدرك ساعة محددة 5:54 دقيقة مساءا ..



***

مكتوب أن يصل عداد سيارتك الى 34.765
لو كنت تعلم أن نهايتك عند ذلك الكليو من العداد ..
لما حركت السيارة من أسفل منزلك فى ذلك اليوم..
ولتخلصت منها فورا ..كفأل كنت تظنه خيرا ..
أو حرصت الا تصل أى من سياراتك المستقبلية الجديدة لهذا الرقم ..
أو اشتريت سيارة مستعملة تجاوزت أمتارها ذلك الرقم المكتوب ..
أخر رقم سيصل له مؤشر سيارتك قبل أن تتحول الى حطام ..
34765

***

دوم ..تك ..بوم
أخر نبضة فى قلبك ..
أخر نفس خرج من صدرك ولم يرجع ..
أخر ردة فعل حاولت بها تجاوز الحادثة أو تلافيها.. لكنك فشلت ..
شريط ذكرياتك كله مر أمامك فى لحظة لم تتخيل معنى الفيمتو ثانية يوما..بدون تلك اللحظة ..
اليوم..
عادت الامانة ..الى خالقها ..
وتركت بصمة ..وعظة وذكرى طيبة وذكريات محفورة ..
أنت الان ياصديقى فى دار الحق ..
ونحن فى إنتظار كل ما مررت به بعدك ..
أخر
ملبس ..
ورقة ..
دقيقة ..
خطوة ..
نبضة..
نفس ..




(إهداء لأخر من فقدتهم من الزملاء – اللذين كانوا ينبضون أمامى بالحيوية وفجأة رحلوا )

رشاقتى

لا احب التفاخر بنفسى كثيرا ...الا اننى والحمد لله من اصحاب الوزن الخفيف ...وهى ميزة لا يعلمها سوى من هم فى مثل وزنى ورشاقتى ...
فمثلا ..انحشر فى اى وسيلة مواصلات ...بلا ادنى مشكلة ...احقق امنيات ورغبات سائق الميكروباص فى يوم خميس ........بالجلوس اربعة على الكنبة الخلفية بلا ادنى مشكلة ....
دائما ما يعتبرنى السائق لقطة للمفاضلة بين الركاب ..لنيل شرف الجلوس فى الكرسيين المجاورين لكرسيه ...معللا ...عشان اعرف اسوق طول الطريق ....
يستغلنى اصدقائى نفس الاستغلال ...اذا اضطرتنا الظروف للسفر بسيارة احدنا وكان عددنا 5 ...يجلس صاحب السيارة فى مقعد السائق ....يتم اختيارى تلقائيا للجلوس بالخلف ...حتى لا اشغل حيزا كبيرا يتحمل ثلاثة منا ...وحتى نحاول وزن العربية حتى لا ننقلب على الطريق ....
فى الاسانسير .....دائما لا اكون عائق على الاطلاق بدخولى على مجموعة منحشرة بداخلة ...لأننى بكل بساطة لن ازيد الوزن باى حال من الاحوال ....كما انه فى حالة محاولة احدهم من اصحاب الوزن الزائد للانحشار بغلاسة معنا ....غالبا ما سيضىء زر زيادة الوزن مصحوبا بصفارة متقطعة تعلن رفض الاسانسير التحرك قيد انملة ....سوى بنزول هذا المتطفل الاخير وصعوبة نزول من هو فى نفس وزنى ...........
احاول الا تقتصر رشاقتى فقط على وزنى الخفيف ...بل لتمتد احيانا الى رشاقة قلمى بالتأكيد ...
يعايرنى الكثيرون من اصدقائى بنحافتى احيانا - التى اسميها رشاقة - ويمتدحنى الزائدون فى الوزن منهم كثيرا ,وقلما نصنحى احدهم بزيادة وزنى ...مبررين (يا ابنى كده كويس ...بكرة تتخن لما تتجوز ...) لا اعرف بالتحديد العلاقة بين الجواز والتخن .....رغم انها نظرية تكاد تكون سليمة بنسبة كبيرة جدا ...لكنها تنطبق على الكرش اكثر من الوزن ..... فالمتزوجون ..دائما ما يظهر لديهم كرش علامة على الزواج ...كما علامة الصلاة للمصلين .
امتلك شلة لا بأس بها من اصحاب الوزن الزائد - واحمد الله انهم ليسوا من اصحاب الدم الثقيل ايضا - و دائما ما اشاركهم الطعام والشراب - للاسف ...لانهم يجورون على كثيرا- .....
نطلب اودر دليفرى ...- الصيغة الانجليزية لطلب الاكل - احاول ان اطلب ما يبعدهم عن طعامى ...باختيارى لنفس ما يختارونه من الاصناف ( هكذا نصحنى صديق واع ) مع الحرص على ان تكون الكمية التى اطلبها مقبولة لديهم .....فلا يصح مثلا ان اطلب سندوتش واحد .....وهم الذين يطلب اقلهم .....5 سندوتشات مع البطاطس والبيبسى والسلطات والذى منه .......
اما فى نطاق مشاريع الجواز - التى لاتتتم غالبا - يكون الطلب الاول للعروسة او امها ......(لازم تتخن......شوية ؟؟)........انا اتخن ....هل يسبوننى ؟؟!!!!
وانا الذى نصف وزنى قراءة وكتابة وسياسة و كورة ...يطالبوننى بزيادة وزنى ...وكيف لى بزيادة وزنى , وانا الذى لا اتبع اى حمية غذائية ( دايت ) , فأنا اكل كل ما اشتهية ...وبقدر اشعر معه اننى اكتفيت من الطعام ...وبنفس القدر المماثل من الشبع ....فأنا لست حمارا ...لكى اكل كالحمير من النجيلة ...فلا الحمير تشبع ولا النجيلة تنتهى ...... ينصحنى المفاجيع لزيادة وزنى ...بأن اكل كل ما يقع تحت يدى ..بلا تمييز ولا بلا تحديد ....(كل اى حاجة وبأى كمية وسيبك من اللى بيعجبك واللى ما يعجبكش ده..مش هيحصلك حاجة ما تخفش) .....ومن الذى ادرانى ...اننى سأجدهم فى المشرحة حولى ..بعد ان اموت من كثرة الاكل ,حتى انتقم منهم............
كما يحقد على غيرهم من اصحاب الوزن الزائد ...( .يا بختك ياعم بتاكل كل اللى نفسك فيه ...ولا بيبان عليك ..)..............حتى الحقد وصل للوزن ؟؟؟
لا يعلم الاغلبية ممن حولى ...ان وزنى الفعلى هو 67 كيلوجراما ...وبما ان العظام تمثل 15 % من وزن الانسان الطبيعى ....و العضلات تمثل 40 % فقط ....والباقى يشمل المخ والقلب والرئتين والكبد والكليتين و الشرايين والقليل من الدهون بالطبع ..... اذن فنصف وزنى تقريبا متمثل فى الاحشاء بالتحديد التى تمثل حوالى 30 كيلو جراما .... اذن فالمطلوب منى ان ازيد وزن احشائى اولا .. فلا امل فى زيادة وزن عظامى او عضلاتى بالتأكيد !!!!

قالوا عن شريف ..............

اختصنى الصديق والاخ العزيز ...محمد عبد الخالق بأهداء غاية فى الروعة فى ذكرى عيد ميلادى السابع والعشرين - عقبال ما يبقى بعد المئة - , وقد غمرنى بشكل رائع بحبه واعتزازه بصداقتى والتى اتشرف واعتز بها , لذلك وددت ان احتفظ به للابد وان اشكره فى نفس الوقت على الكلام الفائق فى تقديره لشخصى المتواضع ,رغم ما بها من سخرية شديدة كدت ان اموت من الضحك مع قرأتها ,الا انها اقل ما
يضحكنى منه .....لانه وبدون مجاملة يفوقنى فى السخرية بشكل كامل وقادر على اضحاك جيل كامل .
كل التقدير والتحية لشخصه على مجاملاته الرقيقة الغالية
واليكم بعض مما ابدعه


(صنم للفتنة منتصب اهواه ولا اتعبده)
مش عارف ليه لما بشوف شريف بفتكر بيت الشعر ده

قالوا عن شريف
يوسف السباعى ...عندما زارنى فى مكتبى لاول مرة عام٧٤حاملا بين يديه روايته الاولى "اللعوج الشاحرة " شعرت وقتها انى امام مستقبل الرواية العربية.
مجلة الاهلى فبراير............. 1993

قالوا عن شريف
تشارلز ديكنز.............لا اذكر انى استمتعت بعمل ادبى طيلة حياتى كما استمتعت بروايته الخالدة (نضارتى النظر اتكسرت ) , يا الهى انه موهوب حقا , ياله من كاتب.
التايمز............ اغسطس فبراير 1956

قالوا عن شريف
وليم شكسبير:على الرغم من اعجابى الشديد منذ ترجمت روايته (البنطاح)الا انى لم التقى به الا اثناء زيارته الاخيرة للندن كان يتناول اللحم المقدد وقدح من الجعة, وقتها لمحت وميض الموهبة المتأجج فى عينيه.
ميكى........... يناير1962

قالوا عن شريف
تشارلز ديكنز......لا اذكر انى استمتعت بعمل ادبى طيلة حياتى كما استمتعت بروايته الخالدة(الشموخ الواحرة).يا الهى انه رائع حقا.ياله من كاتب.
مجلة الاهلى............. فبراير1986

قالوا عن شريف
ام علاء خدامة نجيب محفوظ...دخلت على سيدى نجيب عشان انظف مكتبه لقيت الدموع فى عينيه وقالى بصوت ضعيف كان فيه ناس احق منى بنوبل وشاور على كتاب" الفلول الهائبة " لشريف.
البلاى بوى...........مارس٢٠٠٥

قالوا عن شريف
هيكل... اتصل بى جمال عبدالناصر يوم٦يونيو وطلب ان ارشح له من يكتب خطاب التنحى فرشحت شريف وكان وقتها رئيس تحريرمجلة بلبل وتم استدعائه لكنه رفض عشان كان عايز ينام, وهذه شهادة للتاريخ.
الكواكب.................مايو87

حوار مع صديقى المفلس

منذ فترة كبيرة قررت الابتعاد وبشكل شبه نهائى عن الخروج مع أى من أصدقائى وغير أصدقائى من المكتئبين , لكن يبدو أننى سأضطر للعودة مجددا للخروج معهم وترك غيرهم من المفلسين او مدعيه والحريصين (البخلاء) وكافة أشكال و طوائف أصدقائى الغير طبيعيين بالمرة .

الغرض: الاتفاق الدائم على الخروج أى يوم خميس
الميعاد : نادرا ما يتجمع كل أصدقائى فى خروجة واحدة او يوم واحد لكن سأضطر لتجميع بعض موافقهم معى فى أكتر من مشهد يتكرر كل يوم خميس ....

مشهد 1
صوت مزعج لجرس التليفون الارضى للمنزل ( طبعا صديق من أصدقائى البخلاء الذى لا يتكلم على الموبايل الا فى الحالات القصوى ,فى معظم الاحيان لا يتصل من تليفونهم الارضى بل يتطفل على أى منزل من منازل الاقارب , وفى معظم الاحيان يرن على الموبايل لاقوم أنا بالاتصال بيه !!!!!!)

أرد بتثأوب شديد : خير ......
صديقى الحريص : مش يالا بينا نخرج
أنا : ومالو ...
صديقى (الحريص) : خلاص هستناك تعدى عليا بالعربية كمان قد أيه ؟( رغم أنه يمتلك سيارة الا انه طبعا بيوفر عشان البنزين , وبرغم أنه بيحط بنزين 80 ويبرر دائما أن اخوه واخد العربية او أن بها عطل او أى مبرر والسلام .......للهروب من الخروج بيها )
أنا بغلاسة متعمدة : وهنروح فين إن شاء الله ( السؤال المعتاد )
هو برخامة : هنلف فى الق ..... بالعربية نمز - معناها نتفرج على البنات - (للاسف أنا مضطر لاستخدام نفس المصطلح ) شوية لغاية ما نزهق وبعدين نشوف ....
انا مقاطعا: بس أنا مش عاوز الف بالعربية , البلد بتبقى زحمة وبأتخنق من السواقة ورجلى بتوجعنى , وبعدين أنا مش نازل أتعب نفسى بالسواقة...... أنا نازل أخرج , وكمان أنا مش عاوز أنزل أبص على البنات اللى فى الشارع زى ما انت عاوز – تقريبا.. ده أخر طموحه الفرجه على البنات فى الشارع –
هو : أنت هتقرفنا عشان نازل بعربيتك ؟؟؟؟
انا بكل استفزاز وبرود : خلاص هات عربيتك ولف براحتك .... وأنا هنزل أقعد فى الكافية ولما تخلص لف , ابقى ارجع اقعد معايا على الكافيه .
هو : ياعم هو انا نازل اقعد فى مكان .... عاوزين نشم هوا ( رغم ان البلد مافيهاش نسمة هوا ..والسحابة السودا مالية الاجواء)
أنا : أنا قلت كل الحلول اللى قدامنا ..... فكر وكلمنى وقولى هتعمل ايه ....

طبعا يحاول أن يجد حل وسط , وغالبا ما ّأرضخ له حتى لا نفركش الخروجة .....والتى دائما ما تكون مملة وسخيفة ومتكررة ....!!!!


مشهد 2
صوت جرس الموبايل يرن بشكل دائم

صديقى الاكول : مش يالا بينا نخرج
أنا : ومالو ... مش عيب
صديقى بنهم شديد : عاوزين بقى نقضى خروجة جامدة
انا : اه يا ريت ..... هنعمل ايه ؟
هو : هنروح بقى ناكل كام ساندوتش من ..... وبعدين نشرب حاجة ساقعة .... ونحبس بقى بشاى وحجر شيشة ..... وبعدين نروح ناكل كشرى و......

انا : يا عم حرام عليك هو احنا خارجين , ولا نازلين ناكل
صديقى : هو فى أحلى من الخروجة اللى كلها أكل !!!!

أحاول دائما ان أرضخ لنهمه المستمر , وأوفق الاوضاع ما بين الخروج والاكل مع صديقى الاكول الذى دائما يجبرنى على مشاركته الاكل خارج المنزل ....!!!!


مشهد 3
صوت جرس الموبايل اللعين مصرا على إيقاظى

أنا بصوت ناعس : الوو ....
صديقى المزعج : انت نايم ... معلش صحيتك
انا : أعمل ايه بمعلش دى .... قول يا سيدى ....... خير ؟؟؟
صديقى المفلس : مش ناوى تخرج ؟؟
انا : ومالو مش عيب
صديقى اياه : طيب شوفلنا بقى أرخص قهوة بلدى نقعد عليها , عشان أنا مفلس ( عادة هو مفلس من أول يوم يحصل فيه على المرتب , حتى لو كان المرتب لسه مستقر داخل جيبه )
وياسلام بقى لو تعزمنى ..... تبقى كلك زوق

أنا : بس أنا مش ناقص حر عاوزين نقعد فى حتة مكيفة
هو : ياعم مش فارقه ..... كفاية الصحبة

غالبا ما أرضخ لالحاحه المستمر لقضاء بعض الوقت على القهوة , وغالبا ما أقوم بدفع الحساب لكلانا .

لذلك قررت وبشكل نهائى - مش هأمم يوم الخميس اكيد - الامتناع عن الخروج يوم الخميس مع اى منهم , الا فى حالة انهم يرضخوا لافكارى بشكل كامل .....



هامش ......
أصدقائى السابق ذكرهم لا أستطيع الاستغناء عنهم بأى حال رغم عيوبهم الخطيرة....وتقريبا لا يحلو الخروج بدونهم

مش وش ثروة !!!!!

كنت لفترة طويلة من عمرى لا افهم بأى شكل من الاشكال فى موضوع البورصة ومصطلحات مثل سعر الاقفال وسعر الافتتاح واعلى سعر واقل سعر........ وغيرها من المصطلحات المتعجرفة الخاصة بنطاق العمل فى سوق البورصة , الى ان وزنى (بتشديد الزين ) صديق من اصدقائى المترددين فى كل حاجة والذى لا يرسى على بر –او جو اوبحر - وفى كثير من الاحيان يبقى فى السفينة يفكر فى اى بر ينزل .... وفى الغالب لا ينزل ايضا !!!!, وصديقى السابق ذكره يسعى جاهدا لتكوين ثروة بأى طريقة سريعة ومريحة - للامانة هو بيدور دايما على السكك المشروعة والحلال - ومن ضمن هذه السكك التى كان يفكر ان يربح منها كانت البورصة واقنعنى بحكاية البورصة لكنها ليست بورصة الاسهم والعقارات , بل بورصة الاوراق المالية العالمية , ولمن لا يعرف - واعتقد انهم كثيرين - فهى اخطر الالاف المرات من البورصة العادية وتسمى ب ( الفوركس ) .
وطبعا بعد كلامه الكتير عنها , وعن ارباحها وعن سهولة تعلمها واننا هنصبح اثرياء فى ظرف كام شهر وهتبقى دى شغلتنا الوحيدة وهنبقى كل همنا نفكر نصرف الفلوس فى ايه ؟ , ولقيت نفسى – فجأة وبدون مقدمات وانا الذى لا اهتم مطلقا بالبورصة - بجرى ادور على الكتب الخاصة بتعليمها (الفوركس) , والمواقع الخاصة بيها على النت , وانزل البرنامج المجانى للتعليم فى مجال الفوركس , وبصراحة هى تعليمها مش صعب فى فهم كيفية البيع والشراء , لكن ليها استراتيجيات كتيرة ومتنوعة , وازاى تكسب ولما المنحنى يبقى شكله ازاى تبيع ولما يبقى شكله ايه تشترى , و الشموع اليابانية , والعملات المقابلة , ..... والخ بجد متاهة كبيرة وخطيرة .
يمكن ضيعت حوالى اسبوع من وقتى - اللى فاضى جدا طبعا - فقط لتعلم الاساسيات الخاصة بالفوركس , وبالفعل بدأت فى استعمل النسخة التجريبية للبرنامج للدخول لعالم الفوركس الحقيقى فى كل شىء عدا حسابك الوهمى لكى تحصل على فرصة لتعلم الموضوع بجد , ولكن يبدو ان القدر كان مصمم على انه يصفعنى بالقلم – وبالقفا كمان - ويقولى اجرى العب بعيد , فمع البداية فى تجريب البرنامج اشتريت كمية من اليورو بالدولار - طبعا شراء وهمى - وماهى الا كام ساعة وبدأت الازمة الاقتصادية العالمية الشهيرة والتى مازلنا نعانى منها حتى الان, وبدأ التدهور السريع فى الاسعار العالمية وبدأ البرنامج فى الاستجابة للأزمة العالمية ..... وانخفض سعر اليورو لاقصى معدل له من سنوات ...وبالتالى انا بدأت اخسر اخسر اخسر ...., لغاية ما الرصيد اتصفر (الحمد لله ان الحساب وهمى ) والبرنامج تقريبا طلعلى لسانه , وقالى طريقك ....... مسدود مسدود يا ولدى , وامشى العب بعيد دى مش اشكال ثروة .
نسيت اقولكم ان صديقى المتردد طبعا غير رأيه وقرر انه يدخل مجال البورصة العادية وترك موضوع بورصة الاوراق العالمية بعد ان اقنعنى بها !!!!! ( لن اقول غير متردد )
وحمدت الله كثيرا لانى لم اخسر سوى وقتى , على العكس من صديقى الذى اشترى اسهم حقيقية فى البورصة المصرية ..... وخلال اسبوع تراجع سعر السهم الذى اشتراه بمعدل جنية كامل ( تقريبا 20 فى المية من سعر السهم ) , يبدو اننى لست الوحيد من اصدقائى المنحوس .... واننا كلنا مش وش ثروة ......

ملحوظة : الاحداث تعود لفترة غير قريبة , لكن محاولات صديقى ومحاولاتى للبحث عن ثروة سريعة ومريحة مازالت مستمرة لكلانا ....... ادعولنا ربنا يكرمنا

جبر خواطر

يبدو اننى انحت فى الصخر, هكذا اقول لنفسى دائما بعد ان ارى مدى الاهتمام بالمقالات التى اكتبها , وردود الافعال حول افكارى وافكار من حولى , فدائما ما تكون كتاباتى تعبيرا عمن حولى اكثر من تعبيرى الذاتى بأحوالى وهمومى و افكارى , فمجموع من يقرأ لى اغلبهم من اللذين يقتنعون بى شخصيا , وقد اكون مخطئا ان قلت انهم قد اكتشفوا موضوع اهتمامى بالكتابة بالصدفة , ويتابعوننى من باب الشفقة ومن باب جبر الخواطر .
دائما ما اتحسر عندما اشاهد ردود - كومنتات - الاشخاص على تعليق اى فتاه -خصوصا فى الفيس بوك - , واغلب الردود من الشباب طبعا , مثلا : البنت ( ايا كان اسمها او شكلها او تجاوبها مع المحيطين بيها وايا كان استجابتها للردود ) تكتب مثلا ....... مخنوقة !!!!!
انظر الى كم الردود والذى يتخطى الاربعين ردا او يزيد - ومعظمها من الشباب كما اكدت - فمن يقول لها : سلامتك من الخنقة , من ايه يا قمر , و ...... لا... كله الا انتى يا قمر , انا زعلان جدا انك مخنوقة واتخنقت لخنقتك , ولا تنتهى الا برد او اكثر من صاحبة التعليق بردود اكثر سخافة من اللى كتبوا ليها .
فعلا شعب يجرى ورا اى شىء مؤنث بدءا من عربة رش الناموس - طبعا العربية مؤنث - وانتهاءا بمطاردة اى فتاه فى اى مكان حتى ولو كان الانترنت , لا انكر عن نفسى انى من نفس الفئه ولكنى اقل بكثير فى الحماقة والسخافة فى التعليقات سواء على ولد او بنت ,
لدى صديق ذو خواص انجذابية خارقة , فبمجرد رؤيته لاى فتاه يعجب بها يبدأ فى القاء شباكه تجاهها سواء كانت من النوع القابل للانجذاب او النوع الطارد للاخرين , ولو كانت من النوع الاول فتجده فتح سكه معها بحوار لطيف وذوق و رقيق وشيك وكل الحاجات اللى تخدع بيها اى بنت , وغالبا ينتهى التعارف الاولى فى مكان ما – غالبا مطعم لان صاحبى همه على بطنه – و تعارف ونمر موبايلات و ...... الخ
اما ان كانت من النوع الثانى الطارد للاخرين ,فلا يفقد رزالته او غتاته مهما تعرض من اهانات فى كرامته ,الا عندما يتأكد انه ممكن يتحبس لو كمل فى طريقته , فيبدأ بوقف محاولات الصيد ويذهب لمنطفة اخرى مليئة بالاسماك , وعلى رأيه دائما ( البحر مليان سمك ) ,
فى الفترة الاخيرة عملت مقارنة بسيطة بين المتابعين لاى مدونات نسائية ومدونات شبابية , فوجدت ان الاهتمام بالمدونات النسائية ينصب اغلبه على المتابعين من الشباب والعكس بالعكس
وده لايخرج عن قانون الطبيعة الثابت و الدائم وهو الانجذاب المتبادل او الانجذاب للجنس الاخر.
لا انكر وجود مدونين شباب يتابع لهم القاصى والدانى من الجنسين , لجودة ابداعاتهم وتميزها بافكار جديدة واسلوب عرض متميز , واتمنى اكون منهم
..... لكن دائما لكل قاعدة شواذ !!!!

تشابه اسماء

أعتز جدا باسم الشهرة الخاص بيا واللى بيتكون من اسمى الاول ولقب العيلة , واتعودت دايما تقديم نفسى بيه , كأنه اسم لقائد حربى شهير مثل صلاح الدين الايوبى , مين منا هيعرف ان المقصود هو القائد العظيم بدون لقبه ( الايوبى ) فهناك الالاف بل الملايين من الذين يحملون اسم (صلاح) , فى بداية حياتى المدرسية كنت لا افضل انا ينادينى اصدقائى بلقبى لانهم كانوا يستسهلوا و ينادونى باللقب فقط بدون اسمى , وكنت وقتها معتزا بأسمى بدون اللقب , يمكن كان عندى عقدة انى ابقى مضاف الى لقب - تقريبا كده لانى مش كنت شاطر اوى فى النحو خصوصا موضوع المضاف والمضاف اليه - و يمكن كنت محتاج اخرج من عباءة والدى - زى عبد الغفور البرعى كده فى مسلسل لن اعيش فى جلباب ابى - ويمكن لان معظم زمايلى فى المدرسة كنت متوقع انهم ما يعرفوش اسمى الاول وخفت ينسونى ساعة ما ياخدوا الغياب لانهم مش عارفين اسمى بالكامل , فكل اللى يعرفوه عنى لقبى , وبكده ممكن اتاخد غياب اونطة لو ما كنتش مركز معاهم وقت الغياب .
الموضوع ده بدأ يتلاشى بالتدريج من وقت الانتقال من اعدادى لثانوى , لان عدد اصدقائى اللى انتقلوا معايا قل , وكمان فى زمايل جداد , حاولت جاهدا انى اقولهم اسمى بدون القاب , لكن بالرغم من كده لم انجح فى انى ارسخ اسمى بدون اللقب والفضل يرجع لصحابى القدامى اللى كانوا مصممين ينادونى بلقبى .
فى الكلية اخيرا نجحت فى انى ارسخ اسمى بدون القاب لان عدد اللى دخلوا كليتى كان تقريبا لا يتعدى اصابع اليد الواحدة , لكن اكتشفت بعد فترة من نهاية الكلية ان اللقب مهم جدا فى حياة الانسان , وانه كمان كان مميز ليا بين زمايلى اللى ليهم نفس الاسم الاول , وده خلانى ابدأ اعيد بناء اللقب من جديد , وبقيت مصمم انى اقول لقبى زى اسمى - بدون تخاذل- لاى شخص جديد اتعرف عليه فى اى حته يكون فيهما مجال للتعارف.
مؤخرا عملت بحث على موقع جوجل عشان الاقى الناس اللى مشتركة معايا فى نفس الاسم , فوجدت ان البحث ما توصلش الا لملفات تعريف لا تخصنى لناس تتشابه معايا فى نفس الاسم و استوديو فى القاهرة يمتلكه واحد له نفس اسمى وكان حريص انه يحط موقعه على خرائط جوجل, اهو فرصة يمكن نتصور عنده ببلاش لما يعرف موضوع التشابه فى الاسم و يمكن يكون ليا فى الورث كمان واخدلى بيهم كام صورة وكام كاميرا و كام شريط افلام .
والجميل فى الموضوع ان احد اصدقائى كان بيضفنى للفيس بوك لفت نظرى الى انه لما دور عليا , اكتشف وجود حوالى 25 شخص ليهم نفس الاسم باللقب , وكان حظه كويس انى كنت حاطط صورتى .
طيب اعمل ايه دلوقتى , سواء حافظت على اللقب او ما حفظتش عليه فى لخبطه , اعتقد انى عندى فكرة كويسة اوى عشان اللخبطة وهى ان الشخص يبقى اسم ولقب و 3حروف و 3 ارقام زى نمر ملاكى مصر !!!!

صحيح نسيت اقولكم اسمى ........ ولا بلاش عشان ما لخبطكوش معايا , وعشان ما تحتاروش تنادونى بلقب ولا بدون .!!!!!

كورس انجليزى !!!!!!

اتميز بظاهرة فريدة - اخت فريد طبعا واوعى تكون ما تعرفوش - وهى اننى بمجرد تفكيرى فى بعض الاشياء اجدها تحدث امامى فى وقت قريب , او اجد من حولى يكلمنى فى موضوع بخصوص تفكيرى هذا , او اجد بعض الامور توجهنى لاتمام افكارى السابقة , فى البداية ظننت ان لدى قدرات خارقة وانى احمل صفات غير بشرية او ان بعض من الكائنات الفضائية تجرى بعض التجارب على دماغى الخارق - وطبعا هيبقوا اخطأوا الاختيار مش لاقيين الا انا !!!- , او ان جنى او عفريت يسخر منى بطريقته الخاصة - يا اهلا - , الا ان الموضوع بدأ يقلقنى جدا لحدوث بعض الاشياء بالفعل كما توقعتها وبالخصوص انها اشياء سيئة بالنسبة ليا , مثلا فكرت فى احد الايام هل ممكن جزء من سور البلكونة العتيقة لشقتنا تسقط على عربيتى ويكسر الزجاج او يخبط الصاج ؟؟؟ , وبالفعل ما هى الا فترة بسيطة من تفكيرى الا واصحو على صوت امى " الحق فى حاجة وقعت على العربية ... الناس ملمومة حولين العربية انزل شوف فى ايه ..... " وبالفعل بصيت من بلكونة الشقة لأجد قطعة من سور البلكونة وقد حطمت جزء من الصاج والحمد لله كانت بسيطة وجت على قد الصاج وقلت فى سرى اكيد ده حسد - انا مؤمن جدا بالحسد لانه مذكور فى القران بس كفاية كده حرام عليكم - ,لكن الموضوع ده خلانى اخد بالى من حدوث اشياء افكر فيها وتحدث فعلا , لان الحاجات دى حصلت كتير بس ما كنتش بهتم فى البداية .
من فترة قريبة قريت كتاب اسمه السر - وكمان اتعمل منه فيلم تسجيلى - الكتاب بيقول ان الشخص بيجذب الافكار ليه وليس عكس الاعتقاد السائد , مثلا الناس اللى بتفكر فى انها هتفشل فبتجذب الفشل ليها حتى ولو كانت بتحاول تنجح , لان تفكير الانسان المستمر فى الفشل بيوجه الفشل تجاهه عن طريق موجات معينة بتخرج من المخ وهى المسئولة على جذب الاشياء , بدأت احس ان مشكلتى ممكن تبقى منى – بس المشكلة ان الكتاب بيقول النجاح برضوا اشمعنى انا بجذب الحاجات الوحشة بس !! - , وبرضوا قريت حاجة تانية ان الانسان ممكن يحس انه زار مكان معين او ان موقف معين حصل له بنفس الاحداث ويحس انه بيعيش تانى نفس الحدث , لكن ده برضوا ليه سبب وينتج ان جزء من المخ ممكن يقرا اسرع من التانى , وده المسئول عن الشعور بالاحساس السابق .
المهم الموضوع ده حصلى اخر مرة من كام ساعة , فكرت انى اكتب مغامراتى مع كورس انجليزى اخدته - ممكن يدخل موسوعة جينس للارقام القياسية لاطول مده كورس فى العالم , تقريبا معظم فصول السنة اتغيرت علينا واحنا فى الكورس - احدى صديقاتى اخبرتنى برغيتها فى بدء كورس جديد فى نفس المركز اللى اخدنا فيه الكورس المرة اللى فاتت – اهو كلامى بيتحقق دا انا لسه مفكر فيه امبارح يا جدعان -, وطبعا رغم تجربتى السابقة ومغامرتها ومعانتى من ظروف مجموعتنا الرهيبة الا انى وافقتها بكل تأكيد, يمكن لشعورى بأهمية اللغة وشعور خفى منى للعودة لأيام الكورس الجميلة والاحساس بأنى طالب من جديد - بس بمزاجى طبعا -, لا انسى الشاب المتميز المسئول عن الكورس و اللى كل الطلبة عنده مسمينه المستر الا احنا كنا بنقوله بأسمه ما احنا عشنا معاه فتره لدرجة انه بقا من اصحابنا - و بجد استفدنا منه حاجات كتير غير اللغة الانجليزية – واعجبنا جدا انه متخصص فى اللغات , و يجيد منها حوالى 9 لغات حية و واحدة ميته – مش تريقة والله تقريبا اللاتينى من اللغات الميته فهى لا تستخدم حاليا ورغم ذلك فهو يجيدها - ده بخلاف المواقف الرهيبة التى حدثت خلال فترة الكورس , منها مثلا تسمية مجموعتنا بأسم احد اصدقائنا , لكن صديقنا لظروف عمله سافر خارج مصر , وبعد فترة عرفنا من المستر ان كل المجموعات تقريبا بتبقى بأسم شخص وفى الغالب ما بيخدش الكورس اصلا !!!!
و كثيرا ما خرجنا فى حصصنا عن اللغة الانجليزية وتكلمنا فى الابراج وصفاتها وتوافقها ونقاط قوتها وضعفها - فى البداية لم اكن مقتنعا بموضوع الابراج , بس المستر فعلا فهمنى الفرق بين صفات الابراج و تخمين الحظوظ من خلال الابراج وخلانى اتقبل بعض افكارها -وتكلمنا فى الكورة والسياسة والافلام الاجنبية والمواضيع اليومية والاديان , و مرورا بالحصة المجانية التى كان المركز يعطيها لراغبى المعرفة بنظام المركز , وتقريبا كل صحابنا اخدوا الحصة المجانية - الا قليل منهم - لان ماكناش بنحب نسيبهم يخرجوا لوحدهم فكنا نجيبهم يضيعوا الوقت معانا فى الكورس احسن , ولا انسى صديقى المتميز فى اللغة الانجليزية والذى لم نكن نعرف مستواه الخارق فى الانجليزى , الا عندما شرفنا - فى الحصة المجانية طبعا - وطبعا كلنا تنحنا لما شوفناه بيتكلم مع المستر بطلاقة ولا كأنة مولود فى امريكا وعايش فى حواريها كمان , وكان مدى علمنا ان اللغة الوحيدة المتميز فيها هى لغة السباب والشتائم – بكافة لغات العالم - , ولا ننسى مواعيدنا المتأخرة - نظرا لظروف العمل - والتى كانت تمثل صدمة لكل من يعرف بها نظرا لسخافتها بالنسبة للجميع ما عدا افراد مجموعتنا الافزاز , وكمان تناقص عددنا من البداية للنهاية تقريبا بدأنا بخمسة لغاية ما وصلنا لاتنين وكان فى ناس بتنضم لينا فى حصص متقطعة, اهو تونسنا برضوا اصل القعدة تحب اللمة .
ذكريات الكورس لا تنتهى بالفعل بكم من المواقف الطريفة ,والتى من الممكن ان تجمع فى كتاب من كثرتها , لكن دائما اسأل نفسى متعجبا ليه كل دول العالم التى احتلت من دول اجنبية , اجادت شعوبها لغة المحتل والامثلة لا تنتهى من الجزائر و تونس و المغرب دى حتى انجولا التى احتلتها البرتغال بتتكلم برتغالى !!! , الا مصر التى احتلت من الفرنسيين والاتراك و الانجليز ولم نجيد اى من لغاتهم , لكن تجد المحتل هو اللى اتعلم عربى مكسر , حتى فى تعلم لغة اجنبية فشلنا فى التعلم , رغم قناعتى الخاصة بالحديث الشريف
( من عرف لغة قوم امن مكرهم ) .......... لكن لا حياة لمن تنادى !!!!!!
اتمنى اعرف سبب وعلاج لمشكلتى الخطيرة فى حدوث افكارى بشكل مفزع- خصوصا الحاجات الوحشة - وربنا ما يجيب حاجة وحشة تانى ابدا .


ملحوظة : الصورة المرفقة صورة حقيقية لمكان الكورس ورفاق المجموعة والمستر واعتقد التمييز بينا واضح جدا( وجب التنبيه )

يوميات مواطن مع المرور

اليوم يظهر من عنوانه - زى الجواب بالضبط - دى اول الخواطر اللى جت فى بالى بعد اللى حصلى النهاردة .
طبعا سوابقى مع المرور معروفة جدا, تقريبا كده مسجل خطر فى جرائم المرور على مستوى الجمهورية من سرعة وسير عكس الاتجاه وعدم لبس الحزام و.....الخ , رغم انى من النوع الحذر الى حد كبير فى تلافى الاحتكاك مع مسئولى المرور بداية من امين الشرطة الى مدير الامن , الا ان قليل البخت يلاقى العظم فى الكرشه.
للمرة التانية اتعرض لايقاف من المرور نتيجة لسيرى عكس الاتجاه , وكالعادة لم اكن متعمدا للسير عكس الاتجاه او مخالفة قواعد المرور , ولكن لا حياة لمن تنادى , ولو حلفت على كل الكتب المقدسة انك ما تقصدش و انك ما تعرفش و انك ما خدتش بالك و ان ....... , ما حدش هيسمع ليك ولو كنت خطيب مفوه وعبقرى فى الخطابة زى اوباما ,و طبعا بما انى اتمسكت للمرة التانية فبقى ليا خبرة فى الموضوع , وقدرت اقدر الموقف كويس واعرف ان عسكرى المرور محتاج اى حاجة ينسى بيها غلطتى الشنيعة كعلاج بسيط من داء التذكر واكيد العلاج سهل ومتوفر فى جيبى - زى فيلم الرصاصة ما تزال فى جيبى- وبلاش حد يفهم غلط , وبقليل من الذكاء وتفتيح المخ قدرت اعرف ان الموقف بسيط , وراضيت العسكرى والموضوع مر بسلام بدل الكلبشة والنيابة والذى منه وعدى الموقف على خير , لكن على ما يبدو ان اليوم ما كنش عاوز يخلص بدون ذكرى طيبة مع المرور لان ما عداش كام ساعة الا وانا و احد اصدقائى كنا خارجين بعربيته , وتقريبا عدينا على حوالى 4 لجان مرور فى حوالى 3 كيلو بمعدل لجنة تقابلك كل 7 دقايق سير , و كأن البلد فى حالة احتلال من غزو خارجى ولا كأننا فى الفلوجة وقت احتلال الامريكان للعراق, واحتمال يكون غزو فضائى زى حرب الكواكب , و حظنا كان كويس فى اول 3 لجان , الا ان الحظ لا يقف معاك كتير , فبمجرد دخولنا على اللجنة رقم 4 فوجئنا بوصول لواء مرور , وبمجرد ما وصل اللواء , اصبح الضابط المشرف على اللجنة تقريبا بيوقف عربية ورا عربية للتأكد من وجود اى حاجة غلط عشان يظهر مجهوداته الفائقة فى القبض على المجرمين , وطبعا كنا من ضمن المحظوظين بانه اخد الرخص وقالنا اركن على جنب ,كل اللى كان مقلقنى صراحة موضوع اركن على جنب - مش ناقصين عطلة - وما كنش فارق معايا الرخص لانها مش بتاعتى !!!! , وطبعا اول لما الباشا اللواء مشى , الضابط (المحترم ) رجع لينا الرخص بدون اى كلام ,وكأنه بيقولنا معلش دا لزوم الشغل و الرسم قدام الريس بتاعى .
والمشكلة ان بمجرد تحركنا بالعربية ما كملناش 5 دقايق ولقينا كمان كمين فى منطقة تانية وبعده بكام متر كمين تانى ( يكاد يكون الفاصل بينهم 500 متر ) مع العلم ان المحافظة بتاعتنا –واحدة من محافظات الدلتا - كلها تقريبا تتلف فى ربع ساعة وما تستاهلش اكتر من كمين او اتنين بالكتير وما يكونوش جوا البلد و يكونوا فى مخارجها افضل ,عندى سؤال بسيط هو ليه كل الكماين دى ؟؟ واعتقد ان الاجابة الواضحة ليا هى ان المرور بيعكنن علينا ومش عاوزنا نخرج من البيت او عاوز يطلع سبوبة من الغلابة اصحاب السيارات او عاوز يطلع حاجة تانية ......(ماتفهمونيش غلط) , وبالرغم من ان كل اللى بحكى عليه كان يوم جمعة فكرت فى سرى وقلت امال هيعملوا فينا ايه بقيت الاسبوع , بعد كل اللى بسمع عنه مع المرور لازم اقول لا عزاء لضحايا المرور, ولا نامت اعين ضباط المرور عشان يخنقوا علينا .
ملحوظة :
1. اذا كنت تمتلك عربية ومن سكان محافظتى , ما تخرجش يوم الجمعة ولا الخميس , ولا اقولك ما تخرجش خالص من اساسه !!!!
2. الكلام السابق قد يكون خيال من دماغى , واى تشابة فى الاحداث او المواقف هو تشابه من خيال اللى حصل معاه , وانا غير مسئول عنه تماما .

ما تصلوا بينا على النبى !!!!!!

منذ بدايتى فى فكرة التدوين وانا مقرر جوايا انى احكى عن طرائف اصدقائى ,واعتقد انهم ناوين يعملوا زيى لو فكروا فى الكتابة باعتراف بعضهم ليا فى لحظة صفا, ولكن كل لما افكر فى حاجة احكيها الاقي نفسى متورط معاهم فيها , وبكده بدل ما افضحهم بفضح نفسى , فقلت لازم اشوف حل للموضوع ده , لان اصدقائى مادة خصبة للكوميديا
الحية - اللى هى عكس الميتة اكيد - و لو حكيت عن اى موقف لحد فيهم , متأكد ان الناس هتبطل تتفرج على افلام عادل امام ومحمد سعد وهنيدى , وهتيجى تتفرج علينا واحنا قاعدين على القهوة - الكافيه بلغة الايام دى - بتاعتنا .
وخوفا على مستقبل نجومنا الافزاز , فقررت انى ما احكيش اى حاجة عن الكوميديا الخاصة بزملائى عشان ما نقطعش عيش الفنانين الغلابة دول .
بس الشيطان شاطر وتقريبا ما كنش بياخد دروس خصوصية لغاية كام سنة قريب , لما بدأ ياخد دروس وده من بداية تطبيق نظام الثانوية العامة الجديد , وبما ان مستوى الشيطان التعليمى اتحسن بعد الدروس الخصوصية , فهو وزنى انى احكى على موقف من ضمن المواقف , وان شاء الله ما يعجبش الناس عشان الممثلين دول ما يتقطعش عيشهم زى الناس اللى طلعوا معاش مبكر بعد موضوع الخصصة بتاع شركات القطاع العام .
خدوا عندكم دى عينة بسيطة كده من اللى بيحصل , فى مرة من المرات اللى باتجمع فيها مع اصدقائى, دخل علينا واحد من زمايلنا بالصدفة بدون ما يقول انه جاى, وطبعا احنا لينا وكر محفوظ بالنسبة للجميع- اللى هو القهوة - يعنى لو امن الدولة احتجنا مش هيتعب خالص انه يدور علينا , بعد ما وصل صاحبنا اللى جه بدون سابق موعد بدأ يسأل عن حد من صحابنا القدام ,وطبعا واحد من صحابنا - متبرع دايما بالكلام - كان قاعد معانا قاله " يا عم الله يحرقه دا عيل واطى , دا مش عارف عمل ايه فى فلان وسوى ايه فى علان " , وبعدين يكمل كلامه ويقوله ما تصلى بينا على النبى , فنقوم مرددين عليه الصلاة والسلام , وده طبعا بحكم سماعنا لكلامه , واهو كله ثواب عملا بالحديث اللى بيقول (من صلى على صلاة, صلى الله بها عليه عشرة ).
شوية واتغير الحوار ان صاحبنا ده - اللى بيتبرع دايما بالكلام - حب يعمل فيها حلال المشاكل و زارع السلام فى منطقة الشرق الاوسط الجديد -اللى هما اول ترابيزتين فى القهوة- وصمم ان يحل خلاف بينى وبين واحد صاحبنا , و طبعا فشل وبعدين تقريبا الموضوع عجبه فبقى كل شوية يقولك ما تصلوا بينا على النبى , ونرد فورا عليه الصلاه والسلام , شوية نكمل كلام فى اى موضوع , وصاحبنا اياه يردد فجأه ما تصلوا بينا على النبى , على نهاية الجلسة بينا حسيت ان احنا كنا قاعدين فى جلسة ذكر مش فى قهوة , صاحبنا اياه استمر اعجابه بالموضوع ده , و اول لما روح للبيت قام حاطط استيت على الفيس بوك , وكتب فيها ( ماتصلوا بينا على النبى ) !!!!!!!!
مش قلتلكم دى عينة بسيطة من مواقفهم , الحمد لله القصة مش عجبتكم , كده اطمن على عادل امام وهنيدى و سعد , بقول ليكم ايه ما تصلوا بينا على النبى !!!!!!

خفة -لامؤاخذة- ......دم

كنت اظن نفسى خفيف الدم ,الا اننى كله مرة اتأكد ان خفة ظلى تزداد ثقلا مقابل من اقابلهم من خفيفوا الظل -واحيانا ثقيلوا الوزن – التلقائيون اكتر منى .

فى القهوة الساقى يسألنى عن رأيى فى انفلونزا الخنازير فاجيبة بشكل علمى بحت وان المشكلة ليست فى الخنازير وان الانسان هو الناقل الرئيسى للمرض فأجده بتلقائية شديدة يا باشا انا سمعت انهم بيقولوا فى العالم هيظهر الفترة الجاية انفلونزا قرود , فورا اجبته "يبقى خد انفلونزا تحصل على التانية هدية " .رمقنى الساقى بنظرة افحمتنى –وتقريبا شتمنى فى سرة بشتيمة قبيحة على اساس انى قلتله انه هيجيلوا انفلونزا- وتركنى مش عارف اقول ايه وانا اللى ما بسكتش الا لما الناس تزهق منى , بس بصته كانت زى رصاصة طايشة فى فرح وقتلت العريس.

صديقى التخين -هو بيعمل رجيم عشان ما اظلمهوش- كل لما اقوله كلمة يتحفنى بافيه يموتنى من الضحك , خد عندك كنا فى مسابقة ثقافية وكان السؤال مين اللى بنى القاهرة؟
فورا اجاب صديقى بسرعة خارقة الجمت لسانى واجاب :هشام طلعت مصطفى
طبعا موت كل اللى كان فى المسابقة من الضحك , مش قولتلكم انى ماليش فى الضحك اصلا . وان المحيطين بى تجرى خفة الدم فى عروقهم .

قديما احد الزملاء اخبرنى ان ذوى الوزن الثقيل .لابد ان يكونوا ذوى دم خفيف (يعنى عشان هى مش ناقصة ) ,لم اقتنع كثير بالمقولة لان زميلى طبعا بيقول كده عشان هو من الفئة دى- ذات الوزن الثقيل - لكن مؤخرا تأكدت من ان هذه النظرية سليمة وانى طوال الفترة السابقة كنت اغالط نفسى , ووضح لى ده عندما سمعت من وزير الصحة المصرى يقول ان لا داعى من الخوف من جائحة انفلونزا الخنازير لان مصر لديها اتنين ونص مليون علبة من التامى فلو وماشاء الله تعداد مصر يفوق ال 80 مليون - فى سرى قلت الله يسهل للشركة اللى تملك العقار - بحكم عملى فى شركة للادوية ومعرفتى بمدى حظ مندوب الدعاية اللى شغال على التامى فلو , واللى زمانه نايم فى بيتهم اكيد , والشركة المالكة للعقار (روش ) واللى زمانها تخلصت من اثار الازمة العالمية بعد الموضوع بتاع انفلونزا الخنازير , واهو مصايب قوم عند قوم كلها فوايد .

انا عارف ان الموضوع سخيف جدا عشان كده استنوا احكيلكم على نوادر اصدقائى .

التحول (transformation)

صراحة الكلمة دى بقت اكتر كلمة تضايقنى وتستفزنى -كل ما حد يتزنق (مش يقلع طبعا) فى موضوع يقولك التحول - وكل ما أكلم حد فى موضع يقولى أصل التحول هو السبب فى..

احوال البلد .مالها ؟؟؟؟ اصل التحول الاقتصادى (مش عارف ايه اللى اتحول بالضبط).الكهرباء قطعت -اصل التحول فى مجال الطاقة -
الجو ؟ماله كده وحش اوى النهاردة -اصل التحول فى الاجواء العالمية- الغلاء -اصل التحول فى الاسعار العالمية
مش قلتلكم بقت لبانة فى بق اى حد والله ما هو فاهم معناها بس اهى كلمة بتريح ويحسسك انه فاهم (زى الناس اللى بتيجى فى بر امج السياسة )
لازم يدش فى اى كلام صعب اتحدى نص المشاهدين مش فاهمين والنص التانى اكيد غير المحطة
بس صراحة هى كل حاجة حوالينا فعلا بدأت تتحول بس احنا بقا مش بنتحول بجد؟؟؟؟؟؟
هتقولى ازاى هقولك خد عندك
صاحبك بقا فى منصب ايه فى شركة ايه وبياخد قد ايه (على فكرة ما بنحسدش ) ربنا يفتحها فى وشه (طبعا من ورا قلبى)وانت يا عينى عليك زى ما انت محلك سر
جيرانك؟؟؟مالهم دول كمان .اللى اشترى حته ارض واللى عنده كام مشروع -خلاص يا عم هتبقى فى العمارة لوحدك - وانت هتفضل لغاية ما العمارة تقع فوق دماغ سيادتك وصاحب العمارة يبيع الارض (ربنا يسهله ويرحمك )الفاتحة على روحك

شفتوا بقا التحول
مش هخبى عليكم الشركة اللى شغال فيها اتباعت لشركة تانية (المفروض انها اكبر)طبعا مديرى قعد يتكلم على التحول ودور مصر الحضارى فى التحول _لا مؤاخذة دور الشركة مش مصر- وان فى ناس مش تتأقلم مع التحول ومزايا التحول وعيوب التحول و........مي** ام التحول
فى الاخر الشركة بقت انيل من الاول فى كل حاجة -مش قلتلكم التحول- اللى مش هيتحول هيحوم حواليه ( وعلى رأى اللمبى على الراجل اللى جاى يتقدم للجو بتاعه ..لما قالتله انه بيحوم حوالين ابوها ........بكل برأة اللمبى قالها هو هيتحول ولا ايه )
مش قلتلكم حتى اللمبى بيتكلم فى التحول
.....ودمتم