رقم (شبه) مجهول !!

لا أكره فى حياتى أكثر من هذا الاحساس عندما تتصل بى نمرة غير مسجلة بهاتفى ..
هناك عدة أسباب وتراكمات أورثتنى هذا الشعور بالقلق والتوتر , وعدم الاطمئنان لأى رقم غريب غير مسجل فى لستة هاتفى المحمول ..

فدائما ما يكون أغلبها رقما خاطئا لشخص لا يفقه إستخدام هذه الاداه (الموبايل) ..وقد إتصل خطأ وغير مقتنع تماما سوى بأنه يريد أن يكلم أحمد أبو إسماعيل أو الحاج محمد فراج ..
وأن هذه نمرة أحمد أبو إسماعيل ..!!
مهما أكدت له غير ذلك ..محاولا تنبيهه بكلمات دالة وواضحة ..
(لا والله ...النمرة غلط) !!!
لكن هذه هى طبيعة هؤلاء الاشخاص.. اللذين غالبا لا أفهم لهجتهم الغير متمدنة ( فلاح أو صعيدى اللهجة ) ..لا يبتأس منك حتى بعد أى توضح له حقيقة الموقف ..ويصمم أحيانا أنا يعرف أسمك ورقمك للتاكد من أنك أنت المخطىء الغبى الذى فتح على مكالمته الاصلية للحاج محمد فراج ..وعليك كل اللوم ...ولابد لك من تبرير خطأك هذا والاعتذار بالمرة ..وهذه الفئة لم أعد أسمح لهم بالهرطقة والرغى ..وأستستهل بإغلاق الخط فورا فى وجوههم بعد تكرير عبارة النمرة غلط مرتين على الاكثر ..
قبل أن ينفذ صبرى ..وأهيل بالسباب على أذانهم ..
داعيا على من أمسكهم هذا الاختراع (الموبايل) وهم لا يملكون أصلا حنفية فى منزلهم ..
ومتمنيا الا يوقعه حظه العاثر بالاتصال بى مرة أخرى مكررا خطاؤه ...
حتى لا يسمع منى ما لا يرضيه ..
الفئة الاخرى التى تليها فى الاحتمالية ..
فئة المعاكسة ..
الشخص المرح ..ذو الدم الخفيف ..الذى يضرب أى أرقام بعشوائية شديدة ...ويوقعهم حظهم العاثر فى شخص مثلى يرد بإحترام لمدة لاتزيد عن الدقيقة ..!!
غالبا ما يكونوا من صغار السن اللذين يريدون قضاء وقت مسلى بالاستظراف على خلق الله ..وإضحاك من معهم من الاصدقاء على ردود فعل البشر لسماجتهم المفرطة ..
لابد هنا وان أدعوا على شركات المحمول ..التى رخصت من ثمن خط الموبايل ..ورخصت من سعر الدقيقة ...ورخصت أيضا من حرية المواطن بالاستمتاع بقليل من النوم بدون إزعاج ..
(لاتلومنى على عدم إغلاق الموبايل عند نومى ...فمهنتى لا تسمح لى بإغلاق الهاتف ..حتى فى أيام الاجازة)!!
الفئة الثالثة التى تستهدفنى ..
هى شركات الدعاية لأى حاجة ..
فلاتر مياة (فرصة حضرتك كسبت العرض ..) - كريدت كارد لبنك (***) بدون فوائد وبدون ضمان وإسحب مبلغ ورده بعد 50 يوم - شركة (***) لتأمين الحياة ..وأمن مستقبل أولادك ودخولهم الجامعة وجوازهم !!! طب لما أأمن مستقبلى الاول وأتجوز قبلها ..بلا نيلة !!
عرض كارت سنوى يعطيك خصومات من مليون محل ومطعم وفندق داخل القاهرة الكبرى ..بس أنا أصلا لست من سكان القاهرة حاليا ..!!
والنصباية الاكبر : حضرتك كسبت معانا هدية ولازم تيجى تستلمها ...رحلة لفردين بدون مصاريف !! طب إزاى ؟؟
وهذه النوعية من المكالمات للاسف تأتى اليك غالبا بطريقة غير عشوائية ..حيث يكون صديق لك هو السبب فى توريطك فى هذه الخدمات التى لا تحتاجها ..لكنه بذوق وخبرة يطلب من العميل المساعدة فى أكثر شخص فى دائرته المحيطة ممكن أن يهتم بهذا العرض ..
وطبعا يوقعك حظك العاثر أن تكون فى هذه الدائرة المحيطة فقط ..فلا أنت راغب فى أى عروض ولا معك ثمن المكالمات التى ستحتاجها للاتصال بصديقك لتؤنبه على توريطك فى هذا المطب ..
الفئة الاخيرة ..هى لأشخاص لم ترغب فى إعطائهم نمرة موبايلك ولم تكن ترغب فى إعطائها لهم .. وغالبا لا يتصل بك لله ...بل طلبا لخدمة تقضيها له ..أو دعوتك لحضور حفل زفافه (بس ياريت تيجى بالعربية ...عشان الزفة والمعازيم !!)
وهؤلاء طبعا لم يحصلوا على نمرتك من دليل الموبايلات (الذى لم يُخترع بعد) ..بل من صديق من أصدقائك اللذين يمتلكون نمرة هاتفك .. ولم يتوان عن إعطاء رقمك بلا أن يتأكد فى رغبتك فى هذا أم لا ؟؟
الاصدقاء أيضا متورطين فى هذه الجريمة للمرة الثانية !!
الا لعنة الله على الموبايل فى كل زمان ...
وفى مصر فقط ..
من الاختراعات ...ما قتل ..!!

كفاكم افتاءا يا شعب مصر

بمناسبة حلول شهر رمضان المبارك (كل سنة وانتم طيبين ), افتانى خمس من اصدقائى عن جواز الدخول على موقع الفيس بوك فى نهار رمضان !! , استطعت ان اتمالك نفسى وان اكظم غيظى بصعوبة , وبطريقة من اراد ان يثبت تواجده ومعرفته ببواطن ودواخل الامور , وبكل ملامح الجدية التى اكتسبتها من خبراتى السابقة , اكدت لهم ان الفتنة نائمة لعن الله اى حد يصحيها لانها نايمة متأخر ومطبقة بقالها يومين , وعليه فقد رميتهم بسؤال الجم السنتهم وفغر افواههم للرد على سؤالهم العويص اياه ..... وبصوت لا يخلو من الجدية يليق بجلال السؤال - جلال ده واحد صاحبى ما تعرفهوش - .... ماهى نيتكم من دخول الموقع اياه ؟؟؟؟؟؟ والحق يقال اجابنى معظمهم بكل وضوح عن اسبابه الفريدة - وفريدة طبعا مش اخت جلال - وعددوا اسبابهم وحيثيات دخولهم للموقع اياه .....
وحتى لا ادخل معهم فى متاهات الفتوى ومهاتراتها التى لا طائل منها بالنسبة لى , نصحتهم بمشاهدة اى قناة دينية من تلك الفئة التى تبث فتواها على مدار اليوم , والتى يجيب شيوخها على اى فتوى ولو كنت تسأل عن دخول الخلاء - الحمام ولا مؤاخذة - بالرجل اليمنى ام اليسرى ؟؟
ولا انسى الاحصائية التى اثبتت ان الشعب المصرى من اكتر الشعوب فى العالم افتاءا , ولا يوجد منهم من يقول .....لا اعلم , فهم غير مقتنعين بالمرة بالمقولة الشهيرة ..( من قال لا اعلم فقد افتى ) والمقولة الاخرى الاكثر شهرة ..... ( لا يفتى ومالك فى المدينة ) وعلى اعتبار ان كل مواطن هو مالك لاى حاجة والسلام واكيد ساكن فى مدينة ......لذلك فمن حقه ان يفتى بكل تأكيد .
و لن اردد مقولة السادات الشهيرة عندما قال وبكل فخر .... ( اذا مات جمال عبد الناصر فكلنا جمال عبد الناصر !!!... فمصر بها 40 مليون جمال عبد الناصر -على ايامها كانوا 40 بس - ) بل سأقولها وبكل فخر .... ( اذا لم يتم تغيير المفتى فكلنا مفتى .... فمصر بها 80 مليون مفتى - اه 80 واحتمال اكتر كمان - )
لن اعطيكم الامثلة على صدق كلامى و لن ازيد بالراهين والادلة ولكن ادعوكم لعمل اختبار بسيط فى اقرب جلسة مع اى من اصدقائكم ., جرب مثلا ان تأخد اراءهم فى اى موضوع ... وليكن راءيهم فى طريقة لعب الاهلى الجديدة 4-4-2 , وادعوك للاستمتاع بكم من الافتاءات الخلابة والمتميزة والمتضاربة ...... الم اقل لكم ان ....(اللى خلف ما ماتش )
مؤخرا انتهيت من قراءة كتاب (افتوكالايزو ) للكاتب الصحفى اسامة غريب والذى يرصد ايضا ظاهرة الافتاء التى يتميز بها الشعب المصرى , على ما يبدو ان المرض متفشى اوى ..... والجميع واخد باله .... لذا ساضطر لاعلان المصيبة .... فأنا متهم منذ فترة بنفس التهمة
فأصدقائى منذ اعوام عديدة يقولون انى مفتى - حصلت على اللقب فى اقل من شهر- , ولو علم مفتى الجمهورية بالامر لأصيب مباشرة بالسكتة الدماغية !!!, وقد حصلت على اللقب بسهولة شديدة ..... بفضل شعورهم المريب فى ارائى والتى تكون فى معظمها صحيحة لكن كثرة ابداء الاراء منى فى مواضيع متنوعة جعلهم يشكون فى امرى مرارا , وجعلهم يمنحونى اللقب بسهولة شديدة ...
لكن للافتاء اصول وعلى الاصل دور وهناك من يحاول ان يطور اسلوبه ....
خد عندك مثال :

حكى لى احد اصدقائى عن مطعم صغير لا تتجاوز مساحته مساحة التربة ( متر فى مترين على اقصى تقدير ) , حاول صديقى اخذ رأيهم فى اختياره للطعام متصورا انهم سوف يميزوه بأفضل ما لديهم من الطعام الشهى , الا ان رجاه خاب بعد ما حدث له مع العاملين فى المطعم .
صديقى : ايه احسن حاجة اكلها عندكم النهاردة ؟
مسئول رقم 1 : حضرتك تحب لحمة ولا فراخ ولا اسماك ؟؟
صديقى : افضل فراخ
مسئول رقم 1 : خلاص هنادى لحضرتك على رئيس قسم الفراخ
ياتيه مسئول اخر : حضرتك تحب تاخد ايه فى الفراخ ؟؟
صديقى :انا بفضل شيش طاووق
مسئول رقم 2 : حضرتك تحبه مشوى ولا بدون شواء ؟
صديقى : لا ...مشوى
مسئول رقم 2 : خلاص هنادى لحضرتك على رئيس قسم المشويات .
انتظر صديقى الشخص القادم رقم 3 وتوقع ان يسأله هل يفضل الاكل سبايسى ولا بدون
وفى حالة ايجابه بالاثبات , سيكون رد المسئول : هجيب لحضرتك مسئول قسم السبايسى
الصادم فى الموضوع ان المطعم لم يحاول احد فيه الافتاء فى كلامه ..... على غير العادة , لكن صديقى رجاهم ان يفتوه من البداية فى المرات القادمة ..... اخيرا وجدنا فائدة للفتاوى بدون علم ويبدو اننا شعب ادمن الافتاء طوال الوقت ولا يستطيع العيش بدونها اطلاقا .

شعب طيب

هل شعرت يوما انك ضللت الطريق الى مهنتك , او انك كنت تتمنى غيرها , اعتقد ان كثيرين مثلى تمنوا ان يكونوا اشخاصا اخرين ذوى مهن مختلفة .
ازداد تمسكى بهذا الموضوع بعد حادثة نصاب الاسكندرية الاخيرة , ولمن لم يعرف هو اسمه سيد -وزى الاغنية ما بتقول سيد يا سيد – فهذا الشقى نصب على مجموعة مواطنين فى مبلغ تافه -150 مليون جنيه مش قولتلكم تافه – والغريب والعجيب ان المصريين شعب يسهل النصب عليه (راجع حوادث النصب الخاصة بالبوشى سنة 2009 و ارجع شوية بكتاب التاريخ هتلاقي السعد والريان فى التسعينات ) دى اخرة اللى ما يذاكرش التاريخ كويس , ويبدو انه كما تفوق المصرى القديم فى كافة المجالات فأعتقد ان الفراعنة هم اول شعوب العالم اخترعوا النصب , واقترح على معدين الموسوعات الثقافية و موسوعات سؤال وجواب ان يضيفوا سؤال من هو اول الشعوب اللذين اخترعوا النصب؟
الاجابة طبعا الفراعنة , اعود الى الموضوع الرئيسى وهو ان الواحد لازم يغير فعلا من مهنته ,فكرت واحترت فقلت اسألكم ايه رأيكم فى موضوع النصب ؟؟؟ مش بطال بيأكل عيش برضوا , بس لاحظت ان الواحد برضوا محتاج يكون عنده شوية مهارات ,يعنى محتاج تكون مقنع بدرجة امتياز ويكون معاك مرتبة لزوم الاقناع –مش تنام عليها – وكمان تكون صادق جدا فى وعودك للناس - ده فى البداية بس طبعا - يعنى اللى يديلك ميت الف جنية تستثمرهم لازم ياخد ارباحه فى ميعادها وبالنسبة المحددة , اكيد هتخسر فى الاول بس السمعة بتاعتك محتاجة تضحى شوية , وكمان عشان تكسب ثقة ناس اكتر.
هو شهر ولا اتنين ولا تلاتة بالكتير , وتنزل صورة الواحد فى الجرايد وهو مبتسم وبيضحك -طبعا بيضحك على الناس اللى نصب عليهم – وكل الناس اللى ما اتنصبش عليهم بتحسده على المبلغ اللى لهفوا .
نسيت اقولكم انى ما عنديش المهارات السابقة لذلك ما فيش امل فيا انى ابقى زى الناس المتميزين دول , عشان كده حبيت اساعد الناس اللى عندها مواهب مش عارفه تستغلها .
كلما سمعت عن حادثة نصب جديدة فى مصر اتذكر فورا مدى طيبة الشعب المصرى , واتذكر اعلانات الدولة عن مدى طيبة وترحاب الشعب المصرى –طبعا الاعلان لجذب السياح اللى طبعا ما بيفهموش عربى – لكن يبدوا ان الاعلان اترجم فى عقول الناس النصابين بصورة تانية واستغلوا طيبة الناس بس بطريقتهم .
نصيحة لوجه الله تابعوا الاعلان الجديد بتاع لازم يكون ليك بنك عشان ما يتنصبش عليك (دى اخرة اللى مش متابع الاعلانات ) وطبعا الكلام ده للناس اللى معاها فلوس طبعا ,عشان ما اسمعش شتايم من ناس كتير هتقولى بنك ايه هو احنا لاقين ناكل !!!!!!