امال انت مين يا عم ؟؟؟؟

بصفتى منخرطا فى العمل فى المجال الدعائى ( خصوصا الدوائى منه) ..فأننى اشعر بمدى قوة الحملة الدعائية لشركة موبينيل طوال السنوات السابقة - رغم اننى من مشتركى فودافون ومن محبيها - كذلك تألق القائمين عليها وروعة افكارهم المتجددة المميزة والمبهرة دائما, والبعيدة عن الافكار الجاهزة والمعلبة ...خصوصا اعلانات القرد المتكلم والشبكة الجديدة وجمهورية شمبونجو, اعلانات رمضان ( يا استاذ ما تخلنيش افطر عليك ) , ( يا استاذ صحونى على المدفع ) , وغيرها من الاعلانات المميزة التى امتعتنى انا والكثيرين ...
لفت نظرى مؤخرا اعلان خط المصرى ..الذى يقوم به المطرب المصرى صاحب الطلة المميزة والصوت الاصيل ,وسلطان الاغنية المصرية ...عدوية



الذى تشعر مع صوته بدفء مصر واصالتها وعراقتها .... فعدوية خامة صوتية غير عادية , ذو طلة مميزة , واحاسيس خلابة وجميلة, وصوت تراثى شعبى يندر ان تجده عبر الاجيال .....

الاعلان يبدأ بمواطن مصرى ..يمسك خط موبينيل الجديد ( خط المصرى ) من جاره فى التاكسى متسائلا
ايه المصرى ده ؟؟؟....ليبدأ عدوية بالرد عليه متقمصا العديد من الشخصيات منها سائق التاكسى , الحلاق , المصور الفوتوغرافى , والطيار , والطبيب ..ملخصا أجاباته فى ردود بسيطة ومعبرة عن من هو المصرى ...كان اهمها بالنسبة لى ... امال انت مين يا عم ؟؟؟ والناس الحلوة دى مين ياعم ؟؟؟ النيل دا نيل مين ياعم ؟؟؟ .... وأقلها أهمية بالنسبى لى كان ....امال الكاس دا بتاع مين ياعم ؟؟ ..........وينتهى الاعلان بأنك اذا كنت من مشتركى موبينيل هتكلم 26 مليون مصرى ب 8 قروش( للعلم بالشىء ال 26 مليون هم عدد مشتركى شبكة موبينيل وليسوا عدد سكان دولة شمبونجو )



ولو قدر لى ان اكون بطل ومخرج الاعلان لغيرت من اسئلة الاعلان واماكن تصويرها لتطابق واقعنا الحالى بحذافيره ....

المشهد الاول ....سيكون
موظف يرتدى ملابس متواضعة يخرج اغلب جسده من أحد أبواب أتوبيس حكومى يميل أغلبه ناحية اليمين بقدر عدد الركاب الواقفين فى تلك الجهة ...ينظر لجاره الممسك بخط المصرى ...متسائلا ايه المصرى ده ..فأجيبه ( بصفتى بطل الاعلان بدلا من عدوية ) .. امال انت مين يا عم ..... والاتوبيس اللى انت متشعلق فيه دا ايه يا عم ؟؟ والزحمة المرورية دى فين يا عم ؟؟ الجو الملوث بدخان العوادم ده جو مين ياعم ؟؟؟

المشهد الثانى ....سيكون
نفس الموظف يصل الى منزله ...ليجد ام العيال تصرخ فيه مرتدية جلابية متسخة بكافة الوان الطبيخ ..لم تبدلها منذ شهور مطالبة اياه بفلوس لقلة حيلتها فى اعداد وجبة الغداء ..ثم تتجمع الاسرة حول مائدة الطعام الفقيرة ...لتجدنى اخاطب الرجل ( كبطل الاعلان بدلا من عدوية ..اوعى تكون نسيت ) ......امال اللمة الحلوة دى مين ياعم ؟؟والعيشة الحلوة دى ايه ياعم ؟؟؟ واللحمة اللى مش موجودة على الاكل فين ياعم ؟؟؟ وغلاء الاسعار فين ياعم ؟؟

المشهد الثالث ...سيكون


مختلفا عن المشهد الثالث من الاعلان الاصلى ...فسأجعله امام نقابة الصحفين او وزارة الداخلية المصرية او اى جهة حكومية والسلام , وسيكون اعتصام او تظاهرا او اضرابا لمجموعة من المتظاهرين الذين ينحشر وسطهم الموظف المسكين الذى لا يتظاهر او يعتصم من الاساس ..لكنه يشارك فى الاضرابات كثيرا ...(الا انه جاء هنا لغرض فى نفسى ...الا وهو فكرة اعلانى الخيالى ) , لتجدنى اسأله عن مصريته ....امال الاعتصامات دى لمين ياعم ؟؟؟ والمظاهرات دى فين ياعم ؟؟ والاضرابات دى عشان ايه ياعم ؟؟وشهيد الطوارىء مين يا عم ؟؟؟ والسحل فى المظاهرات والاعتداء على المتظاهرين ايه ياعم ؟؟؟ وقانون الطوارىء قانون مين ياعم ؟؟؟


المشهد الربع ..سيكون
فى موقع يطل على النيل محاطا بأكوام الزبالة ..تقوم المصانع بجانبه بألقاء مخلفاتها الكيميائية والعضوية فيه عبر ماسورة مباشرة بلاخوف او كسوف ... والرجل الموظف يركب مع اسرته مركب نيلية ويلقى ببقايا علب العصيروالكانز والسندوتشات فى النهر الخالد , اما الاطفال فيقوموا بقضاء حوائجهم فيه حتى يختلط البول بالماء اختلاطا كليا .....وتجدنى اخاطب الرجل من فوق كوبرى قصر النيل ..واسأله ....امال النيل الملوث بتاع مين ياعم ؟؟؟ والزبالة دى فين ياعم ؟؟؟ والعبارات اللى بتغرق دى بتموت مين ياعم ؟؟؟؟

المشهد الخامس ...سيكون
فى هيئة حكومية ...حيث زحام المواطنين امام المكاتب ولا كأنه طابور لجمعية استهلاكية , الموظف صديقنا يجلس برفقه زملائه فى تكاسل شديد ...رافعين شعارا وطنيا خالدا ..( فوت علينا بكرة يا استاذ ) ...او تجد احدهم قد استغل نفوذه فاتحا درج مكتبه للرشاوى المتخفية فى صورة اكراميات او دخان ....وكالعادة اظهر فى الكادر للموظف صديقى ( بصفتى بطل الاعلان بدلا من عدوية ...اوعى تكون زهقت انى لسه بفكرك بالموضوع ده ) لاخبره بقيمة وطنه ..امال الروتين دا فين ياعم ؟؟ والبيروقراطية دى بتاعت مين يا عم ؟؟؟ والرشاوى دى فين ياعم ؟؟؟

المشهد السادس والاخير ...سيكون


فى مستشفى حكومية ..حيث تجد المرضى الغلابة يفترشون ارضا ..ولا تجد حولهم من يرعاهم ..فالطبيب انشغل بالكلام بالموبايل الذى يصرف عليه من مرتبه المكون من 300 جنية والذى يصرف اضعافه لكى يصل للعمل بشكل مقبول ....الموظف المسكين يجلس فى غرفة الطوارىء المليئة بالمرضى ..انتظارا لوصول الطبيب الذى سيتكرم بالكشف عليه وعلى المرضى المطرحين ارضا ...
لتجدنى اظهر فى الكادر من امام جهاز الاشعة العطلان ...لاسأله
امال الاهمال الصحى ده بتاع مين ياعم ؟؟؟ والتسيب والاستهتار دول فين ياعم ؟؟ الناس المريضة دى مين ياعم ؟؟؟ ياااااااااااااااااااااااااااااااااا عم

(اكتفيت بالمشاهد الست ....لانها ستستغرق منى حوالى 50 ثانية والتى تعتبر المدة المنطقية لاى أعلان..وحتى لا يخرب بيت المعلن )

لكن للاسف هذا الاعلان سيكون محكوم عليه بالحبس داخل رأسى , ولن أجد شركة - ولاحتى شركة لبان - ستخاطر بعرضه , وبالتالى بما اننى الوحيد الذى سيكون مقتنعا به .... ..فقررت ان اضيف اليه مئات من المشاهد والمواقع المختلفة ...واستفيض فى الاسئلة التى تعرفنا بمصر الحقيقية التى نعيش فيها و تعيش فينا ..... وستكون من اهم الاسئلة المضافة لاعلانى الخيالى
امال حكومة رجال الاعمال دى حكومة مين ياعم ؟؟؟ الفساد ده فين ياعم ؟؟وجمال مبارك دا مين ياعم (فى الخلفية لوحة مكتوب عليها سلطان الاغنية السياسية ) الحديد دا حديد مين ياعم ؟؟؟؟ (الاجابة سهلة طبعا ..حديد عز ) .... والبلد اللى بتتباع ( بتتخصخص) بلد مين
ياعم ؟؟؟؟..ياااااااااااااااااااااااااااااااااا عم
.........لو كنت مصرى تقدر تنضرب وتتهان وتتبعتر كرامتك بأقل من 3 قروش للدقيقة ...واسأل 75 مليون مصرى متهان ومتبهدل ومتمرمط .

خمسين !!!!!!!!!!!!!

بمجرد نزول اعلان فودافون بتاع ( خمسين ) , شعرت انها نصاباية جديدة من الشركة الموقرة التى احمل لها خطين رغما عنى - واحد بارادتى والتانى خط بدون ارادتى خاص بالشغل - ورغم قناعتى الخاصة بجودة خدمة فودافون بالمقارنة بموبينيل - ام نبيل ده الاسم الحركى للشبكة - الا ان موضوع الخمسين اللى اتقال فى الاعلان لم يتجاوز تفكيرى فيه سوى ان يكون عرض جديد من عروض فودافون الخايبة , وكان اقصى طموحى ان تكون النصف ساعة بخمسين قرش – يا بلاش يا بلاش - , هكذا كان تفكيرى المحدود والضيق والظالم فى نفس الوقت , فبمرور كام يوم ظهر الحق , وطلع الموضوع اكبر من 50 قرش وتخطى حاجز خيلاتى المحدودة , فالشركة قررت انها تعطى 50 عربية بى ام دبليو هدية لخمسين فائز , وبدون اشتراك فى خدمة معينة او الاتصال برقم , او ارسال رسالة فاضية لاى نمرة , يعنى بالبلدى كل اللى عنده خط فودافون يبقى دخل فى المرشحين للفوز- فى سرى قلت كويس انا معايا خطين يعنى فرصتى كبرت وتراجعت عن موقفى من الخطين فجأة - , بس طبعا فرصتك تزيد كلما اتكلمت اكتر او شحنت اكتر او ...... اى حاجة اكتر من غيرك .
وكلما قابلت صديق اخبرته بانى معشم اخد العربية البى ام دبليو , وابيعها واعيش من ريعها ,فقد كنت اتصور انها تتجاوز ال300 الف جنية , الا ان صديقى الخبير بأمور العربيات - واللى دايما يقولى انه ركب عربيات عمرى ما احلم بيها ورغم ان سواقته للسيارات لا تتعدى حدود سواقة الفلاح للجرارات للحرث فى الارض الزراعية - قالى بكل اسف ان العربية بتاعت فودافون لن تتجاوز 140 او 160 الف جنية كاقصى تقدير , وطبعا الاحباط بدأ يتملكنى وحسيت بالخيانة حتى الجايزة مستخسرين فيه مبلغ يتخطى الربع ارنب - ما تقولش يعنى كسبت - وشكيت فى كلام صديقى لانه من اصحاب خطوط الموبينيل العتيقة وممكن يكون عاوز يحسسنى بعدم اهمية الموضوع عشان هو طبعا مضايق انه مش فودافون , لكن بالرغم من صدمة تمن العربية مازلت متعلق بامال المكسب , واقول اكيد هيكلمونى فى فودافون بكرة
" مساء الخير ...... حضرتك شر ....... صاحب الخط رقم 01069..... واجيب فورا : ايوة , مبروك يافندم حضرتك كسبت من فودافون عربية بى ام دبليو , وحضرتك تشرفنا فى اى وقت تستلم العربية , ياريت تجيب معاك البطاقة وحضرتك جاى ....... شكرا لاتصالك بفودافون مصر " توت توت ... ...طبعا ده صوت الخط بعد ما يتقفل وانا بتنطط زى العيال الصغيرة من الفرحة بمكسبى واجرى اقولهم فى البيت انى كسبت , لكن فجأة اعود من خيالى الى ارض الواقع واتذكر مدى حظوظى القليلة فى المسابقات , وانى من النادر ان اكسب فى اى مسابقى تعتمد على القرعة !!!!!!
وفجأة وجدت كل من حولى يخبرنى بأن فرصته كبيرة فى الفوز بالسيارة ,و ان فودافون بعتتله رسالة انه دخل المسابقة كام مرة - يا نهار دا انا مافيش ولا رسالة جاتلى ...يا خبتى القوية - وصديق تانى يخبرنى برقم فاتورة موبايله والتى تجاوزت ال3 الالاف جنيها , ولا يتضايق من رقم الفاتورة رغم كبر المبلغ , وبكل برود يقولى اهو فرصتى فى الفوز بالبى ام دبليو تكتر , وانا اللى كنت معشم على انى افوز ؟؟؟ ......فعلا المنحوس منحوس ..... ولو كانوا 50 عريبة من فودافون !!!!!!