الجمعة، أبريل 24، 2009

فيروس سى لكل مواطن

لا تستغرب ولا تستعجب فقد تأكدت أننا فى بلد الشفافية والصراحة.....
سأسمع أصوات من أشخاص كثيرين .. تزيد عن الهمهمة وتقل عن معدل ريختر بنص درجة وقد يكون صدورها منهم فيه أحكام لمصدريها - بسبب كلامى - يستوجب معه حكم محكمة
ما علينا ...هتقول عليا مجنون - وايه الجديد - يا جماعة صدقونى طب شوفوا بس التصريح ده وأنتم تتأكدوا من كلامى .....
بتاريخ 23ابريل 2009
وزير الصحة: ٩ ملايين مصرى مصابون بفيروس «سى» النشط.. و٣٠٪ من المرضى يشفون لأسباب غير مفهومة
الخبر نقلا عن المصرى اليوم
ضحكت من أعماق قلبى بمجرد قراءة العنوان , وقلت أكيد الوزير مش وزير مصرى أكيد هندى .. لكن صورة الجبلى صدمتنى بوسامته وشياكته ..أكملت قراءة الخبر بالتفصيل الممل لقيت شوية نكت بجد تضحك ...
إسمع يا سيدى....
أعلن الدكتور حاتم الجبلى، وزير الصحة، أن أول مسح ديموجرافى لبيان أعداد المصابين بفيروس الكبد الوبائى «سى» كشف عن إصابة ٩.٨٪ من إجمالى السكان"؟؟؟؟.
يا نهار عشر الشعب عنده فيروس سى يا حلاوة فعلا....واكيد التسع أعشار الباقين بين سرطان وسل و قلب وسكر و....... ماشاء الله فعلا المصريين لسه بخير

وأعترف فى حواره مع الإعلامى خيرى رمضان ببرنامج «البيت بيتك» مساء أمس الأول بأن كل الدراسات والإحصاءات - التى كانت تستند إليها الوزارة من قبل - لم تتسم بالدقة،(يا نهار أسود امال هما بقالهم سنين يعملوا إيه .. يعنى كل الشغل كان غلط) ولم تتم فى سياق علمى، مما يجعلها غير مجدية (يعنى وهو ايه اللى مُجدى فى البلد أصلا )، ولا تصلح حتى للنشر فى الدوريات العلمية (علمية ايه بس يا عم جبالى ما تصلى على النبى)؟؟؟؟؟
استنوا ده لسه الزُبد جاى...

وأوضح الجبلى أن الوزارة شكلت لجنة قومية لمكافحة أمراض الكبد، ضمت ٧ متخصصين منهم ٥ مصريين وأمريكى وفرنسى

أدى اللى مش بحبه وكنت خايف منه .. لجنة قومية تانى .هى لو مش لجنة كنت إطمنت بس ما دام جت سيرة اللجنة يبقى عرفنا مصيرها ..يا عم دول لسه بيحققوا فى صفر المونديال بلجنة أبقى قابلنى - العنوان ما يتوهش اسأل انت بس- واللى قلقنى طبعا موضوع الاجانب أمريكى وفرنساوى .. دا الموضوع اكيد فيه اختلاف بين الدول الكبرى عشان كده
لم يكتفى الوزير بالكلام السابق .. أنما زاد الطين بلة وقال ...

«سنظل نعانى لمدة ٤٠ سنة مقبلة مع المجموعة المصابة بالمرض حتى نتمكن من القضاء عليه».
مش عاوز أتكلم تانى.. أسيبكم أنتم تتكلموا وتنفعلوا...أربعين سنة ايه يا عم الوزير ..وأنت طبعا هتكون فى الوزارة .. وهتيجى ساعتها وتقول إن الشغل مش كويس وإنك هتعمل لجنة لتقيم الوضع .......ياخوفى
عجبنى كمان تعليق أحد القراء على الموضوع
وأستطرد: «سنظل نعانى لمدة ٤٠ سنة مقبلة مع المجموعة المصابة بالمرض حتى نتمكن من القضاء عليه». أعتقد أن فترة الأربعين سنة هي العمر الأفتراضي للمرضى و بذلك يكون أخر الجملة "القضاء عليهم" و ليس "القضاء عليه" طريقة مصرية صرف للقضاء علي الأمراض وهي التخلص من المرضي و بالتالي نتخلص من المرض ...
والله عنده حق 40 سنة يكون الناس اتوكلت على الله وماتت وبكده نبقى خلصنا على المرض والله فكر جديد - شعار الحزن الوطنى بمعناه الحقيقى - حاجة تفرح بجد
أتمنى لكم جميعا الصحة والسلامة وربنا ما يحوجكم لحكومة زى حكومتنا

هناك 3 تعليقات:

Mona يقول...

6- يعلن وزير الصحة أن 9 مليون مصرى مصابون بفيروس سى النشط و30% من المرضى يشفون لاسباب غير مفهومة!!! ده علشان الناس تطمن أن عندها مرض أخر كارثى غير أنفلونزا الطيور ولا علشان يفهموا أن أن شاء الله 40% من مرضى أنفلونزا الطيور برضة سيشفون لاسباب غير مفهومة بس أنتو قولوا يارب

أنا كنت كاتبة الكلمتين دول عندى أمبارح والحمدلله أنه لسة عندنا صحة لخفة الظل - تحياتى

Nehal Kamal يقول...

و الله يا عم شريف ...انا اشتغلت قبل كده فى التوعيه الصحيه عن فيرس سى ..و المعلومات اللى عندى ان التسع مليون مصرى اللى بيعانوا من المرض دول اللى حللوا و تاكد وجود المرض عندهمده غير اللى ماحللوش و لسه ما اكتشفوش وجود المرض ...و ان اكتر من نصف الشعب المصرى يعانى من فيرس سى ما بين كامن و نشط ...من ساعه ما عرفت المعلومه دى و انا خايفه اروح احلل دم !!! ربنا يسترها معانا .... لعلمك الشعب المصرى من الشعوب اللى ربنا اصطفاها للشهاده ..المواطن المصرى بيموت شهيد ...يأما يموت مبطون او يموت فى حادثه طريق و هو رايح يجيب رزقه و رزق عياله ...ربنا يرزقنا الشهاده جميعا ...و انا لله و انا اليه راجعون

شريف القاضى يقول...

-الكلام بجد جميل وعجبنى موضوع التحليل بتاع موضوع فيروس سى ,نظرية المؤامرة ان الحكومة نواياها مش كويسة يعنى تعلن ان 30% مصاب عشان تدارى على انفلونزا الطيور ......بس انا عاوز اااكد ان الحكومة اتغيرت ونوايها فعلا سودة علينا ؟؟؟
وبالنسبة لموضوع الشهادة وان المواطن بيموت شهيد من كل الطرق فلازم ااكد ان الشهادة لازم تبقى مختومة من اتنين موظفين مرتبهم اكبر من 370 جنية (سهلة طبعا)