اليوم يظهر من عنوانه - زى الجواب بالضبط - دى اول الخواطر اللى جت فى بالى بعد اللى حصلى النهاردة .
طبعا سوابقى مع المرور معروفة جدا, تقريبا كده مسجل خطر فى جرائم المرور على مستوى الجمهورية من سرعة وسير عكس الاتجاه وعدم لبس الحزام و.....الخ , رغم انى من النوع الحذر الى حد كبير فى تلافى الاحتكاك مع مسئولى المرور بداية من امين الشرطة الى مدير الامن , الا ان قليل البخت يلاقى العظم فى الكرشه.
للمرة التانية اتعرض لايقاف من المرور نتيجة لسيرى عكس الاتجاه , وكالعادة لم اكن متعمدا للسير عكس الاتجاه او مخالفة قواعد المرور , ولكن لا حياة لمن تنادى , ولو حلفت على كل الكتب المقدسة انك ما تقصدش و انك ما تعرفش و انك ما خدتش بالك و ان ....... , ما حدش هيسمع ليك ولو كنت خطيب مفوه وعبقرى فى الخطابة زى اوباما ,و طبعا بما انى اتمسكت للمرة التانية فبقى ليا خبرة فى الموضوع , وقدرت اقدر الموقف كويس واعرف ان عسكرى المرور محتاج اى حاجة ينسى بيها غلطتى الشنيعة كعلاج بسيط من داء التذكر واكيد العلاج سهل ومتوفر فى جيبى - زى فيلم الرصاصة ما تزال فى جيبى- وبلاش حد يفهم غلط , وبقليل من الذكاء وتفتيح المخ قدرت اعرف ان الموقف بسيط , وراضيت العسكرى والموضوع مر بسلام بدل الكلبشة والنيابة والذى منه وعدى الموقف على خير , لكن على ما يبدو ان اليوم ما كنش عاوز يخلص بدون ذكرى طيبة مع المرور لان ما عداش كام ساعة الا وانا و احد اصدقائى كنا خارجين بعربيته , وتقريبا عدينا على حوالى 4 لجان مرور فى حوالى 3 كيلو بمعدل لجنة تقابلك كل 7 دقايق سير , و كأن البلد فى حالة احتلال من غزو خارجى ولا كأننا فى الفلوجة وقت احتلال الامريكان للعراق, واحتمال يكون غزو فضائى زى حرب الكواكب , و حظنا كان كويس فى اول 3 لجان , الا ان الحظ لا يقف معاك كتير , فبمجرد دخولنا على اللجنة رقم 4 فوجئنا بوصول لواء مرور , وبمجرد ما وصل اللواء , اصبح الضابط المشرف على اللجنة تقريبا بيوقف عربية ورا عربية للتأكد من وجود اى حاجة غلط عشان يظهر مجهوداته الفائقة فى القبض على المجرمين , وطبعا كنا من ضمن المحظوظين بانه اخد الرخص وقالنا اركن على جنب ,كل اللى كان مقلقنى صراحة موضوع اركن على جنب - مش ناقصين عطلة - وما كنش فارق معايا الرخص لانها مش بتاعتى !!!! , وطبعا اول لما الباشا اللواء مشى , الضابط (المحترم ) رجع لينا الرخص بدون اى كلام ,وكأنه بيقولنا معلش دا لزوم الشغل و الرسم قدام الريس بتاعى .
والمشكلة ان بمجرد تحركنا بالعربية ما كملناش 5 دقايق ولقينا كمان كمين فى منطقة تانية وبعده بكام متر كمين تانى ( يكاد يكون الفاصل بينهم 500 متر ) مع العلم ان المحافظة بتاعتنا –واحدة من محافظات الدلتا - كلها تقريبا تتلف فى ربع ساعة وما تستاهلش اكتر من كمين او اتنين بالكتير وما يكونوش جوا البلد و يكونوا فى مخارجها افضل ,عندى سؤال بسيط هو ليه كل الكماين دى ؟؟ واعتقد ان الاجابة الواضحة ليا هى ان المرور بيعكنن علينا ومش عاوزنا نخرج من البيت او عاوز يطلع سبوبة من الغلابة اصحاب السيارات او عاوز يطلع حاجة تانية ......(ماتفهمونيش غلط) , وبالرغم من ان كل اللى بحكى عليه كان يوم جمعة فكرت فى سرى وقلت امال هيعملوا فينا ايه بقيت الاسبوع , بعد كل اللى بسمع عنه مع المرور لازم اقول لا عزاء لضحايا المرور, ولا نامت اعين ضباط المرور عشان يخنقوا علينا .
ملحوظة :
1. اذا كنت تمتلك عربية ومن سكان محافظتى , ما تخرجش يوم الجمعة ولا الخميس , ولا اقولك ما تخرجش خالص من اساسه !!!!
2. الكلام السابق قد يكون خيال من دماغى , واى تشابة فى الاحداث او المواقف هو تشابه من خيال اللى حصل معاه , وانا غير مسئول عنه تماما .
ليست هناك تعليقات:
إرسال تعليق