خمسين !!!!!!!!!!!!!

بمجرد نزول اعلان فودافون بتاع ( خمسين ) , شعرت انها نصاباية جديدة من الشركة الموقرة التى احمل لها خطين رغما عنى - واحد بارادتى والتانى خط بدون ارادتى خاص بالشغل - ورغم قناعتى الخاصة بجودة خدمة فودافون بالمقارنة بموبينيل - ام نبيل ده الاسم الحركى للشبكة - الا ان موضوع الخمسين اللى اتقال فى الاعلان لم يتجاوز تفكيرى فيه سوى ان يكون عرض جديد من عروض فودافون الخايبة , وكان اقصى طموحى ان تكون النصف ساعة بخمسين قرش – يا بلاش يا بلاش - , هكذا كان تفكيرى المحدود والضيق والظالم فى نفس الوقت , فبمرور كام يوم ظهر الحق , وطلع الموضوع اكبر من 50 قرش وتخطى حاجز خيلاتى المحدودة , فالشركة قررت انها تعطى 50 عربية بى ام دبليو هدية لخمسين فائز , وبدون اشتراك فى خدمة معينة او الاتصال برقم , او ارسال رسالة فاضية لاى نمرة , يعنى بالبلدى كل اللى عنده خط فودافون يبقى دخل فى المرشحين للفوز- فى سرى قلت كويس انا معايا خطين يعنى فرصتى كبرت وتراجعت عن موقفى من الخطين فجأة - , بس طبعا فرصتك تزيد كلما اتكلمت اكتر او شحنت اكتر او ...... اى حاجة اكتر من غيرك .
وكلما قابلت صديق اخبرته بانى معشم اخد العربية البى ام دبليو , وابيعها واعيش من ريعها ,فقد كنت اتصور انها تتجاوز ال300 الف جنية , الا ان صديقى الخبير بأمور العربيات - واللى دايما يقولى انه ركب عربيات عمرى ما احلم بيها ورغم ان سواقته للسيارات لا تتعدى حدود سواقة الفلاح للجرارات للحرث فى الارض الزراعية - قالى بكل اسف ان العربية بتاعت فودافون لن تتجاوز 140 او 160 الف جنية كاقصى تقدير , وطبعا الاحباط بدأ يتملكنى وحسيت بالخيانة حتى الجايزة مستخسرين فيه مبلغ يتخطى الربع ارنب - ما تقولش يعنى كسبت - وشكيت فى كلام صديقى لانه من اصحاب خطوط الموبينيل العتيقة وممكن يكون عاوز يحسسنى بعدم اهمية الموضوع عشان هو طبعا مضايق انه مش فودافون , لكن بالرغم من صدمة تمن العربية مازلت متعلق بامال المكسب , واقول اكيد هيكلمونى فى فودافون بكرة
" مساء الخير ...... حضرتك شر ....... صاحب الخط رقم 01069..... واجيب فورا : ايوة , مبروك يافندم حضرتك كسبت من فودافون عربية بى ام دبليو , وحضرتك تشرفنا فى اى وقت تستلم العربية , ياريت تجيب معاك البطاقة وحضرتك جاى ....... شكرا لاتصالك بفودافون مصر " توت توت ... ...طبعا ده صوت الخط بعد ما يتقفل وانا بتنطط زى العيال الصغيرة من الفرحة بمكسبى واجرى اقولهم فى البيت انى كسبت , لكن فجأة اعود من خيالى الى ارض الواقع واتذكر مدى حظوظى القليلة فى المسابقات , وانى من النادر ان اكسب فى اى مسابقى تعتمد على القرعة !!!!!!
وفجأة وجدت كل من حولى يخبرنى بأن فرصته كبيرة فى الفوز بالسيارة ,و ان فودافون بعتتله رسالة انه دخل المسابقة كام مرة - يا نهار دا انا مافيش ولا رسالة جاتلى ...يا خبتى القوية - وصديق تانى يخبرنى برقم فاتورة موبايله والتى تجاوزت ال3 الالاف جنيها , ولا يتضايق من رقم الفاتورة رغم كبر المبلغ , وبكل برود يقولى اهو فرصتى فى الفوز بالبى ام دبليو تكتر , وانا اللى كنت معشم على انى افوز ؟؟؟ ......فعلا المنحوس منحوس ..... ولو كانوا 50 عريبة من فودافون !!!!!!