أمثال تدوينية ج2

• إكتب التعليق مطرح ما صاحب المدونة يعوز ..
• التدوين فى الصغر ..كالتعليم فى الكبر بالضبط... لا يوجد بينهما اختلاف كبير...
• فى العموم ..(لذة العيش فى التقلب ) , فى التدوين ..(لذه المُدون فى التشقلب)...
• حط بوستك ما طرح ما تحط كومنتك ....
• تأتى التعليقات بما لا يشتهى المدونٌ ...
• اللى يدون لوحده ....يزهق ...
• اللى كاتب بوست محيره ...يجيب قارىء ويطيره ....
• قال يا مُدونين ...يكفيكوا شر الغير معروفين .....
• يصوم يصوم ..ويفطر على بوست ..
• اللى ما يشوفش من الفونط ...يكبر ريسوليشنه ( his resolution ) ..وأنا ايه ذنبى ؟؟؟
• ضربوا المُدون على عينه ..قال خسرانة خسرانة ...( من تحقيقات أمن الدولة مع احد المدونين )
• المُضطر يكتب الصعب ...
• اللى يخاف من التعليق ..يطلعله ..ينزله ( من وحى أغنية عووو)
• التعليق اللى ما يصبش يدوش ..
• أكتب ما فى الراس ..يأتيك ما فى الغيب ...
• قال يا قاعدين ..يكفيكوا شر المدونين ...
• أصبر على المُدون السو ..يا تجيله مصيبة ...يا النت يقطع عنده...
• اللى ما يعرفش يدون يقول .... سووووووو وات (?? so what )
• ما تبصليش بعين ردية ...دا أنا طلع عينى فى التدوينة ديه .....
• يا بوست النهاردة بفلوس .. بكرة يبقى ببلاش ...
• المضطر .....يقرأ لأخر البوست مضطرا أحيانا ..
• المدونة لصاحبها ...والجرى للمتابعين ....
• وترجع المدونة ...لبوستاتها القديمة ....
• بوست فى اليد ...خير من عشرة على الفيس بوك ....
• اللى مدونته من بلوج اسبوت blogspot...ما يحدفش الناش فى الورد برس wordpress ......
• فاقد البوست ...لا يعطيه ...
• المدونة فى الراس مش فى الكراس....
• المدونة عليها حارس ...( الحارس اكيد من امن الدولة )
• المنحوس منحوس ..ولو حطوا على مدونته فانوس ....
• المُدون يتباهى بكتابات ابن اخوه ....
• قالوا للمدون إحلف ...قال جالك بوست جديد ...
• من شابه كاتبه المفضل ....فما ظلم ...( من تعليقات القراء د.نهال كمال)
• موضوع ..وإتقسم نصين ...( من وحى سرقات الافكار والموضوعات هذه الايام)...
• اكتب بوست ...وسيح فكرته ....
• المدونة ..من بره هالله هالله ...ومن جوا يعلم الله...
• المُدونة مش ورث ..دى اتكتبت بخلع الدرس ....( من خلفيات عربيات النقل)
• المُدونة من حلوان ...وصاحبها راجل غلبان ( من خلفيات عربيات النقل)
• المُدونة من دمياط ...وصاحبها عليه أقساط ..( من خلفيات عربيات النقل )
• المُدونة من الزقازيق ...وصاحبها راجل برىء (من خلفيات عربيات النقل )
يمكنك أن تضع إسم أى محافظة ويمكننى إكمال المثل بنفس الوزن والقافية ..........
• أكتبى يا جارية ...هات الافكار يا سيدى ..
• إن غاب البوست ...أكتب الأفكار ...
• المدونة بصيرة , والمواضيع قصيرة ... ( سر النجاح )
• عدم التعليق (زى السكوت ) ...علامة رضا....
• المُدونة أم الاختزال ......
• قالوا الناس مدونين..وبقينا خمس تلاف فى 3 سنين ..( من إعلان اتصالات المميز)
• حبيبك يبلعلك الزلط ..وعدوك يستنالك الغلط ( ولو فى همزة)
• أخدنى بوست ورمانى كومنت ....
• اللى يكتب على بلوجه ينفع نفسه .....
• عشمتنى بالبوست ...جهزت انا تعليقى ( لا أقصد أحدا بالتحديد ..بتحصل عادى يعنى ؟؟؟) ..
• رُب بوست خير من الف تعليق ...



ويمكنك قراءة الجزء الاول من هنا أمثال تدوينية ج1