من اجلك انت .........

انفض جميع رجال الدولة لحضور ندوات وجلسات مؤتمر الحزب الوطنى ... - العامر بالمفاجأت المثيرة للضحك .... - عن تشيع جثمان مفكر كبير اثرى وجدان الملايين فى مصر بعلمه الغزير وفكره الرصين وفلسفته الخاصة ومبادئه الدينية المبنية على اسس علمية فريدة , وعلى دوام السنوات استمتع الملايين غيرى بمتابعة برنامجه الاهم فى تاريخ البرامج العلمية والدينية معا , برنامج (العلم والايمان ) ...فانا اذكر ان يوم الاثنين من كل اسبوع كان يوم مهم لى فى فترة الطفولة ...نظرا لاستمتاعى بمشاهدة برنامجه بعد نشرة التاسعة - وكم سهرت لاحاول اكمال الحلقة الى نهايتها ...وفشلت احيانا واحيانا نجحت - وانتظارى لعجائبه الفريدة وافلامه الوثائقية المثيرة للعجب والدهشة من فرط ما فيها من انجازات علمية لم اسمع او اقرأ عنها من قبل ولن اسمع عنها من بعد ....
لم ينل العالم الجليل التقدير من الدولة خلال حياته ولا بعد مماته , فهو ليس من رجال السلطة حتى ينال التقدير , ولا ان يحظى بشرف اهتمام الدولة , فلم يزره مسئول خلال مرضه , ولم يشارك فى تأبينه اى رجل من رجال الدولة الافزاز - معلش اصلهم حاضرين مؤتمر الحزب ....والغياب عليه درجات - , ولم نشاهد اغلاق للبرامج ,ولا اذاعة للقرأن الكريم طوال النهار على شاشات التليفزيون الحكومية , ولا اعلان حالة الحداد ...فالمرحوم - بأذن الله - اسمه مصطفى محمود وليس محمد علاء......
رحم الله العالم الكبير المستنير بعلمه و دينه , والسابق لعصره , والفاهم لامور دينه ودنياه
........................................................................................................
حاولت كثيرا ان انسى موضوع مؤتمر الحزب وتصريحاته لانها تصيبنى بالنكد والغضب ,وبداية من اول تقرير عنه شعرت بمدى خيبة الامل , والاصرار على قرطسة الشعب المصرى غصب عن انفه ...... ( ومعلش كل واحد يجيب القرطاس على حسابه كمان )
ففى البداية اعلنها عز عن رفضه لاقتراح هيكل , واعتراض الحزب على افكاره الخاصة بتعيين مجلس انتقالى حتى بدء الانتخابات , ومرورا بكلام حسام بدراوى : (بان مصر دولة مؤسسات , ومن ايام محمد على تنتقل السلطة - وراثيا !!!!!! - عدا ما حدث فى ثورة 52 ) ,وان جمال مرشح لخوض انتخابات الرئاسة القادمة , كما اعلن عز عن ان الحزب على استعداد تام لجماعة الاخوان المسلمين - المحظورة و الممنوعة - فى انتخابات الرئاسة , ولجميع قوى المعارضة المصرية ................ابقوا قبلونا (على لسان احمد عز والحزب )



ولكن كل ما سمعته كوم ,و ما قاله الرئيس فى خطابه كوم تانى خالص فبعد وصلة من الاخبار- المسربة من داخل الجلسات - ذات الطابع الكئيب والمستفز لشعور الجميع واعلامهم بأن (التوريث علينا حق ) ...., وشعورى بنكد شديد لما سمعته او قرأته , انقلب الحال الى النقيض وكدت اموت من فرط الضحك بسماعى لجزء من خطاب السيد الرئيس لا لجودة و رصانة اسلوبة وكلامه المريح للاعصاب ووعوده وانجازاته .....فحاشا لله ان انكر كل هذا على الرئيس , لكن لبساطة الرئيس مع الحضور وكلامه الخارج عن الورق المكتوب ....
خذ عندك اجزاء مما قاله الرئيس فى خطابه لبعض الحضور



الريس لاحد الحضور : هو انا هأقعد افر فى كل حاجة فى البلد .... ياراجل كبر مخك ( اه وعهد الله الريس قاله كبر مخك ....انا خفت يقوله كبر الجى وروق الدى .....زى اتش دبور )
موقف اخر ...........
الريس لشخص سأله عن موضوع طرحه بشكل انشائى بحت ,وحاول المواطن ان يستوضح من الرئيس شخصيا فقاله : مش هقولك على اللى هعمله , لما اعمله , هتعرفه ......
وشوية لما لقى الاجابة مكتوبة فى الورق للسؤال ...قام قاله : لو استنيت كنت هتعرف كل حاجة
موقف اخر ................
الريس لاحد الحضور الصارخين طوال الجلسة : كفاية كده ...ياراجل زورك وجعك

هل صدقتم كلامى عن خفة دم الرئيس التى انستنى كل همومى , وجعلتى اتمسك به رئيسا لفترة رئاسية قادمة , وهل هناك احد غيرة يهرج مع شعبة بهذا الشكل ؟؟؟!!! , وهل هناك من هو بخفة دمه وبساطته وتواضعه الرهيب ؟؟!!!

..........بعيدا عن مؤتمر الحزن الوطنى - الحزب الوطنى سابقا - , فاليوم هو يوم مختلف بالنسبة لى لكثرة احداثه المرتبطة بأشياء قرأتها او شاهدتها مؤخرا .....
بدءا بوفاة العالم الجليل مصطفى محمود (اخر ما شهدته امس كان حلقة من العلم والايمان على قناة اقرأ لاستيقظ على خبر وفاته صباحا )
ومرورا بخبر وفاة رئيس المخابرات الاسبق امين هويدى ( امس قرأت اجزاء من اعترافات اعتماد خورشيد عن صلاح نصر مدير المخابرات , والتى تولى التحقيق فى احداثها كان .. امين هويدى )
واخيرا اعلان بلال فضل عن انتهاء تعاقده على كتابة عموده اليومى بالمصرى اليوم (الاصطباحة) لاكتشف ان اليوم مر سنة على اول اصطباحة قرأتها له ....يااااااااااااه دا كأنه امبارح والله , هى السنة بتعدى بسرعة اوى كده !!!! ( وقد كنت امس اتوقع بداية المقالات الساخرة للبلال بمناسبة مؤتمر الحزب .....لأجده يعلن توقفه عن الكتابة فى المصرى اليوم لانشغاله بكتابة مسلسل جديد )
اعتقد ان سرى باتع ماعدا واحد فقط لا يتأثر - اكيد طبعا عارفينه - .....
لذلك ......................ماقرتش اى حاجة النهاردة ولا اتفرجت ....خوفا من تأثيراتى الرهيبة على الجميع .....وربنا يستر.

س . ح . م

المصرى اللى على حق يقول للسكة الحديد والقطارات ....لاء لاء لاء
وكما قالتها من قبل المطربة روبى فى اغنيتها الخالدة ( كل اما اقوله اه يقولى هو لاء لاء لاء ........ لا اعرف بالتحديد مين المقصود اللى بيقول اه وان كنت اعتقد ان ماحدش هيقول لروبى لا طبعا !!!!!) , وكما صدعتنا وزارة المواصلات على مدار شهر كامل بحملة دعائية للسكك الحديد والقطارات والمصاريف التى تم صرفها على تطويرها وتحديثها , وتجسيد المشكلة فى المواطن اللى بيزوغ او اللى بيسرق من القطر الحنفيات - يا راجل حرام عليكم الحرامية ما بيركبوش قطارات ....دول بيركبوا طيارات دايما وعلى درجة رجال الاعمال كمان والاسماء كتير ما تعدش – او اللى بيعمل شاى فى القطر - ما تعملوا بوفيهات محترمة الاول ...ولا الناس لازم تتعذب خلال رحلة القطر ....
لا اعرف النبرة العالية للجميع بتهميش الادب الساخر والكتابة الساخرة , ووصفها بالاستسهال والسطحية والتفاهة وخلوها من الجودة والعمق كالادب الجاد الرصين , ووصف من يكتبها بقليل الثقافة والمستسهل , وان الجميع اصبح يكتب بشكل ساخر ,واصبح الوسط الثقافى ملىء بالكتاب الساخرين الذين لا يملكون اى ادوات ليكونوا كتاب من الاساس ....
ولهم اقول ان الواقع المحيط بنا ملىء بالسخرية اليومية التى تفرض علينا بشكل دائم ,
انظر مثلا : جاموسة تتسبب فى حادث قطار العياط الاخير , والسائق نزل يتفرج على الجاموسة اللى داسها , ولما اتخبط القطر فر السائق هاربا ...................
وهل هناك كوميديا اكتر من هذا العنوان الصحفى الذى نشر فى اهم الجرائد المصرية بعد الحادث ؟؟؟؟؟؟!!!!! , هل هناك دولة فى العالم يموت فيها عشرات الاشخاص بسبب جاموسة طائشة ؟؟؟!!! , اعتقد ان التحقيقات ستسفر عن ان الجاموسة مختلة عقلية وتعالج فى مصحات نفسية منذ فترة ,وانها كانت هربانة من ضغط الشغل فى الغيط .........
دائما يلفت نظرى اختصار السكك الحديدية المصرية ( س . ح . م ) الذى اعتقد انه يشير بكل تأكيد الى ال (س) ح . الد (ح) . ا (م) بو ......ادى الواد لابوه اصل الواد بيعيط
و اعتقد ان وزارة النقل ستقوم بتغيير الشعار الى ( ك . س .ح .م ) وهى اختصار الى كوارث سكك حديد مصر , ولا عزاء للفقراء فى موتاهم ....
فالحكومة ستقوم بتعويض المتوفى ب 30 الف جنية فقط لاغير ( مقابل 300 الف فى حوادث الطيران كتعويض ) ...الى هذه الدرجة حياة البنى ادم المصرى رخيصة ......يا للعار
منذ فترة كبيرة وانا مصاب بحساسية من الحديد الخام المسئول عنه المهندس احمد عز , لكن يبدو ان العدوى ستصبح ايضا تجاه حديد السكك الحديدية المصرية المسئول عنه محمد منصور
( شيفروليه ) - انا اللى هسوق الاوبترا ...قصدى انا اللى هسوق القطر -
دائما اذكر قطارات لندن الشهيرة التى تأتى فى مواعيدها بالثانية لتصيبنى الحسرة وخيبة الامل , فلو وجدت ميعاد قطارك القادم فى التذكرة 10 : 19 :11 فلا تستغرب فالقطار سيصل بالفعل فى الموعد المحدد بكل دقة لان كل شىء محسوب بدقة متناهية( فالسرعة تساوى المسافة على الزمن ) , بمعنى ان القطار لو تحرك بسرعة 100 كيلو على ساعة فمن المفترض ان يجتاز المائة متر فى الساعة - مش محتاجة نباهة والمصحف !!!!! - , لكن فى مصرنا الحبيبة من الممكن ان تنتظر القطار بالساعات ومن الممكن ان يصل بعد موعده بايام وليس بساعات فقط ( راجع موقف قطار الاسكندرية الاخير الذى وصل من الاسكندرية الى القاهرة فى حوالى 16 ساعة ( ولا كأنك مسافر كندا ) !!!!
وتمشيا مع شعار الحملة الدعائية المتمثلة فى ( المصرى اللى على حق ...يقول للغلط لا )
فأنا بقول للغلط لا وللاهمال لا ,وبطالب بمحاسبة المسئول الاكبر قبل الاصغر عن جريمته فى حق الوطن وفى حق المواطن .... وبلاش بقى نضحى بكام موظف وكام مسئول عشان الوزير يعيش .. نريد محاسبة عادلة للجميع , واتمنى ان يصل صوتى للجميع .......
لكن .................
انك تسمع ان ناديت حيا ..., ولكن لا حياة لمن تنادى !!!!

بلد العجايب

انفردت مصر بأنها اول دولة فصلت الانتاج على التوزيع (طبعا اقصد انتاج العيش البلدى ابو مسامير ....!!!!) واول دولة لحمت حصيلة لمّ الزبالة مع فاتورة الكهرباء فى فاتورة واحدة - بيفكرنى بالتحام المكوك الفضائى مع مدار القمر- وهى تجربة رائدة تستحق التدريس فى الخارج ليتعلموا منها كيفية ونوع اللحام المستخدم , و رغم موقف الحكومة الحالى من عدم قدرتها على لمّ الزبالة من احياء القاهرة وضواحيها الا ان دمج الزبالة مع الكهرباء تجربة تستحق الاحترام والانحناء بكل تأكيد !!!!! , وكما انفردت مصر باحدى عجائب الدنيا السبعة قديما - الهرم الاكبر - انفردت بكل عجائب الدنيا التسعة وتسعين الحديثة من فساد ومحسوبية ووساطة وتخاذل وتدهور اخلاقى وثقافى واجتماعى..............وسلسلة لا تنتهى من المهازل التى ينفرد بها المجتمع المصرى العجيب !!
ومؤخرا كانت احد اهم العجائب هى ترشيحات انتخابات الرئاسة القادمة .......
وتفرغ الجميع مؤخرا فى توقع مرشحى انتخابات الرئاسة المصرية 2011 وتسابقوا لاعلان اسماء مرشحيهم الوهميين من خلال توقعات وتخمينات لم ترتكن لرغبة الاسماء المرشحة بالترشح اصلا ....ولم يخلو الموضوع من انكار بعضهم اصلا لفكرة الترشح - هما مش ناقصين مشاكل وقلق طبعا -.....هو احنا نطول الشرف ده اصلا ( على لسانهم )
كما اصابتنى الدهشة لخلو قائمة المرشحين من جهات عدة من اسم الرئيس مبارك الاب وشمولها لمبارك الابن !!!!
فصحيح ان ابن الوز عوام - عوام ونص طبعا حد يقدر يقول غير كده -
وصحيح اللى خلف ما متش - والمصحف لسه عايش وما متش - وعلى رأى عادل امام فى مسرحية الزعيم ( هو فى رئيس بيموت ..!!!!!!)
, لكن تجاهل المرشح الاقوى من وجهة نظرى ماهو الا تمويه مقصود او تأمر عقيم على اهم المرشحين الذى اعلن مرارا عن عدم نيته الترشح فى الانتخابات الرئاسية القادمة ..... (مش مصدق طبعا ... لو حلفولى على الميه تجمد )
اتمنى رؤية انتخابات نزيهة وقوية , يتنافس فيها مجموعة من المرشحين المميزين وان يكون لدى كل منهم رؤية سياسية شاملة و خطة متكاملة للنهوض بالدولة داخليا وخارجيا ..
والله العظيم شبعنا من الانتخابات , وكفايانا ترشييييييييييييييييح بقا
وكل ما يهمنى فى موضوع الترشيح اياه هو ترشيح مياه الشرب لاخر قطرة....والقطنة ما بتكدبش كفاية مجارى علينا كده !! , واتوقع طمعا منى ترشيح الهواء من دخان قش الرز , فأنا منذ بدأ السحابة السوداء وانا اصبحت مدخن بالاكراه , واصاب بحالات من الاختناق الاجبارى بجانب الاختناقات المرورية اليومية المعتادة , ولحسن الحظ فانا اكتب حاليا والدخان يحيط بجهاز الكومبيوتر الخاص بيا ....لذلك فأنا غير متاكد من كل الكلام السابق ذكره ,,,, ولاى ملاحظات على كلامى ارجو الاتصال بيا على نمرة الطوارىء الخاصة بانفلونزا الخنازير - على الارضى ما تقلقوش دا الدقيقة ب 3 قروش - , هتلاقينى قاعد هناك شوية ....بريح من الدخان بتاع السحابة .
وكلما سمعت كلمات اغنية بلد العجائب من غناء منير - على ما اتذكر الاغنية بتقول .... تعالى قوام خدينى على بلد العجايب ....مش عارف هو كان بينادى على مين فعلا - تأكدت ان منير يقصد مصر بكل تأكيد !!!
اعتقد انك لو لسه مكمل قراية اكيد نسيت انا بتكلم عن ايه اصلا فى المقال ده , وعشان ما تحسش انك تهت وانى السبب هقولك ارجع لاول المقال السطر السادس والعشرين تقريبا ....وانت هتعرف كويس انا عايز اقولك ايه ............................( انتخابات الرئاسة 2011 ) ان عشنا وكان لينا عمر واللى يعيش ياما يشوف

خناقات على الهوا

تحولت الساحة الاعلامية فى مصر الى حروب علنية , تسابق فيها الجميع لاثبات تفوقهم وحدهم وخطأ الاخريين , وابراز عضلاتهم فى الشتيمة والردح والشرشحة والذى منه ...
ولم يقتصر الامر على الاعلام المرئى - الفضائيات الخاصة - بل وصلت الى صراعات على صفحات الجرائد اليومية والاسبوعية , واصبح الجميع لا يتحدث الا عن خناقة فلان مع علان او شتيمة ترتان ل شورتان , وسى دى فنتان الى برتكان ........الاسماء طبعا معروفة للجميع ولا تحتاج للتوضيح !!!
هل اصبحت سطوة الاعلام وهالته فى المجتمع هى المحرك لكافة الاحداث , وتسابق الجميع لتصيد اخطاء الاخريين و اظهار تفردهم وفصاحة لسانهم ووجاهة افكارهم وسطوة قلمهم وانتشار صوتهم من خلال ابواق الاعلام المتنوعة .
مؤخرا قررت الا احدد موقفى تجاه احد من الطرفين, لان الحقائق دائما ما تنقلب فجأة , والذى كنت اظنه موسى يطلع فرعون ......وحتى لا اصاب بصدمة عصبية من اكتشافى لحقيقة اى منهم - بعد ظهور الحقيقة فى قلة من الخناقات - , واصبحت لا اهتم بمن المخطىء ومن البرىء ولا احب ان اظهر اعجابى بموقف اى منهم على الاخر ولا اميل برأيى لكلام ايهما.
فنحن فى زمن العجائب , ويخرج من قلب الحقائق مئات الاكاذيب ...!!!!!!!!
ساقوم بعرض مجموعة من النماذج المتصارعة فى الفترة الاخيرة واشهر الخناقات فى الوسط الثقافى والرياضى والفنى والدينى ايضا .... لتوضيح ما وصل حالنا اليه !!!!
اولا : خناقة شوبير مع مرتضى منصور ( مرتضى منصور لا يهدأ دائما ولا يتوقف عن سب الجميع وتهديده لهم بامتلاكه لوثائق تدينهم امام الرأى العام , ومع شوبير زودها بامتلاكه لسى دى فاضح ......اقترح على المسئولين عمل قناه تختص بأخر قضايا منصور واشهر الاوراق التى يملكها و خططة المستقبلية للقضايا ضد ابرز رجال الدولة - يشملهم طبعا رئيس الوزراء احمد نظيف - ........ ورغم كل هذا فلست مع شوبير ايضا ولا ضد مرتضى منصور ,واكتفى فقط بمشاهدة حلقة جديدة من مسلسل مرتضى منصور مع المحاكم ومع خصومه , ولا اخفى طبعا استغرابى من شوبير الذى تضخمت ثروته وسلطاته الغير محدودة وسطوته فى المجلس ..... اذن فلننتظر الجديد منهما )
ثانيا : خناقة بلال فضل مع فاطمة ناعوت ( الاثنان ينتميان لنفس الجريدة ولا اعرف كيف سمحت لكليهما بهذا الصراع الخفى - والعلنى - على صفحاتها , وان كانت ناعوت تزيد بالكتابة فى جرائد اخرى .......ورغم حبى الشديد لبلال فضل وتأيدى لافكاره , الا اننى لم انتظر منه ان يصل به الامر الى ان يمسح بها البلاط ويسخر منها على مساحة مقالة اليومى ...... ولكنه صراع مثقفين واسلوب الحوار بينهم يحتاج الى متابعة من فئة معينة )
ثالثا : خناقة جلال عامر وعبدالله كمال ( لا اتابع الثانى واقرأ بانتظام للاول , ولكن لست مع ولست ضد ايهما لعدم معرفتى بالتفصيل الرئيسية للخناقة )
رابعا : خناقة مروة رخا مع محمد الشرقاوى (والتى وصلت الى تضحية مروة بنشر كتابها الكترونيا بعد احساسها بعدم الاهتمام من جانب الناشر محمد الشرقاوى لنشر وتوزيع كتابها , ووصل الامر لتبنيها لموضوع النشر الالكترونى لجميع الكتاب الراغبين فى النشر الكترونيا على موقعها مجانا .... )
خامسا : خناقة شيوخ قناة الناس مع شيخ الازهر (حول موضوع النقاب , ورغم عدم اقتناعى بكلام شيخ الازهر فى معظم الاحيان لاحساسى بتسيسه للدين وعدم ثبات موقفه فى كافه القضايا المشابهة , الا ان تطاول الجميع على موقفه له مبرر احيانا, واحيانا بدون .......وادينا بنتفرج على الخناقة كالمعتاد )
سادسا : خناقة مدحت شلبى وعلاء صادق ( حول موقف كل منهم فى تحديد مصير تأهل المنتخب الوطنى فى حالة الفوز بفارق هدفين ....فمدحت قال 2-0 تأهل المنتخب , وعلاء قال لا 3-0 ومسك علاء صادق على كلام مدحت ووصفه بالجاهل والمطبلاتى ...وطبعا مدحت رد بانه بغبغان و كلب .......) بيتخانقوا على ايه مش عارف لما نلعب الاول ونكسب نبقى نتكلم ....جتكم خيبة !!!!!
سابعا : خناقة نور الشريف مع رئيس تحرير البلاغ ( حول نشر الجريدة تهم ملفقة عن نور , ووصول الامر للقضاء والنائب العام )
الخناقات لا تنتهى ,وقد اكون نسيت خناقات اكثر ضجيجا , الا ان الامر زاد عن الحد واصبح الجميع ينتظر الجديد من الخناقات كل يوم , للتغطية على مشاكله اليومية ونسيان الاحباطات والصراعات التى يواجهها على مدار اليوم .
اذن لننتظر الجديد من الخناقات ......وكل خناقة وانتم بخير .

الناكس ( السادس سابقا ) من اكتوبر 2009

يبدو اننا اصبحنا مصابين بلعنة الطليان و اصبحت لعنة الفراعنة امامها بلا قيمة, فأى منتخب مصرى يتغلب على الطليان - فى مبارة اسطورية يتحاكى عنها الجميع - يتبعها فورا بنكسة كروية , متمثلة فى خسارة غير متوقعة على الاطلاق فى المبارة التالية مباشرة ,مؤخرا نال منتخب الشباب (المدلع ) خسارة جديدة على يد منتخب كوستاريكا المجتهد فى وسط حضور مهيب 81 الف مشجع مصرى ظلوا يشجعوا بلا كلل او يأس حتى منى الفريق بالهدف التانى فى الوقت القاتل (الدقيقة 88) , ليتحول انتصار اكتوبر المجيد على يد شباب مصر - واضح فعلا انه هيبقى جيل مشرف لمصر- الى نكسة كروية جديدة عهدناها فى الفترة الحالية من جميع فرقنا المصرية , ولا احب ان اكون متشائم - يارب يخيب ظنى ....عشان ماحدش يقول غاوى افقر وعدو للنجاح - وابشر الجميع بان مصر لن تحتاج الى الفوز على الجزائر فى مبارتها مع مصر لان مصر لن تفوز باى حال على زامبيا ......على عكس التوقعات طبعا , وبالتالى فالجزائر ستتأهل رسميا فى المبارة القادمة ولن تفرق نتيجة ماتشها معانا ...
ودائما ما يتعلق المشجع المصرى بقشاية -رغم انها لن تنقذ غريق فى وسط المحيط طبعا !!-, ويحاول طوال الوقت طمئنة نفسه ان الامل موجود وان الفرصة مازالت سانحة , ويعيش حالة من الايهام الذاتى بخيالات اقرب الى المستحيل بانتصارات يحققها المنتخب الوطنى لا تحدث سوى فى خياله , فبعد انتصارنا على ايطاليا فى كأس القارات انتظر المشجع المصرى منتخبنا الهمام فى النهائى امام البرازيل مرة اخرى ليعوضوا الخسارة امامهم فى الافتتاح ....وطبعا امريكا خلصت على كل الاوهام دى فى المبارة التالية ولم نصعد اصلا للدور التالى من البطولة , ولا انسى بمجرد اعلان مجموعة مصر فى تصفيات كأس العالم ....هلل الجماهير المصرية لدخولنا لكأس العالم - واحنا لسه ما لعبناش ولا ماتش اصلا ...فعلا شعب عاطفى - , ومؤخرا منتخب الشباب اعطى الامل بعد فوزه على الطليان للجمهور بوصوله لنهائى البطولة وامكانية حصوله على اللقب ايضا ........هأو هأو هأو
انا لا احب الاصطياد فى المياه العكره ولكن اصطاد احيانا فى مياه المجارى التى تروى الاراضى الزراعية المصرية !!!!!! لكن انا احاول ان اكون واقعى دائما فى توقعاتى لاداء الفرق والمنتخبات المصرية التى دائما ما تعطينا الامل ..... ثم تأخذه فى لمح البصر (سيبونا حتى نتهنا على الامل شوية ) , وأحمد الله اننى لست مشجع زملكاوى والا لاصبت بالاحباط من كثرة انتكاسات كل الفرق التى اشجعها , فيكفي هزائم المنتخب الوطنى المصرى على اعصابى وصحتى - يا جدعان انا لسه فى عز شبابى عشان يجيلى الضغط والسكر ...حرام عليكم - .....
وللا سف بمجرد ان شعر اللاعب المصرى بأهميته وبمعرفة الجمهور له بأسمه , وبدأ بالتمرد والتراخى والكسل والغروروالتعالى .......الخ من الصفات التى تربى عليها اللاعب دائما منذ صغره , وهل ننسى اعلانات كوكاكولا ......روحوا شجعوهم عشان تعرفوهم , والتى لم نكن نعرف ايا من ابطاله سوى محمد طلعت لاعب الاهلى - اول المغرروين للاسف - والتى شعرت فيها بأن المنتخب بيشحت الجمهور عشان يشجعه فى البطولة , وبمجرد ما حس الشباب المصرى بمعرفه الجمهور له ...بدأ مرحلة الدلع والاستهتار والتمرد (مثال التمرد طبعا بوجى .....من غير طمطم اكيد ), وحطنا فى حسبة بيرما كالعادة وخسر المبارة الثانية , ولولا ستر ربنا كنا طلعنا من الدور الاول كمان .
واكتفى لاعبى منتخب الشباب بتحويل ذكرى انتصار اكتوبر الى نكسة جديدة للكرة المصرية ولم يراعوا مشاعر 81 الف متفرج ( المذيع الداخلى قال عدد الحضور داخل الملعب قبل نهاية المبارة بعشرين دقيقة لتحفيز اللاعبين ...ولكنهم صمموا اكتر على الهزيمة بالهدف التانى لكوستاريكا ) ولم يضعوا فى اعتبارهم ذكرى نصر اكتوبر التى ضحى فيها شباب مصر بأرواحهم فداء لمصر.......وعجبى !!!!
اكتفى بهذا القدر من الحديث عن هزائمنا الكروية المهينة .....لاواصل استمتاعى بمشاهدة المباريات الاوربية ....التى اشعر فيها باحترام اللاعب لنفسه اولا قبل ناديه او منتخب بلده

جيل اكتوبر

لست من المحظوظين بكونى من جيل حرب اكتوبر الخالدة , وذلك لاسباب خارجة عن ارداتى ( لانى من مواليد الثمانينات ......مش بمزاجى يعنى انى اتولدت بعدها بعقد كامل المرة الجاية ان شاء الله ابقى اضبطها !!!!!!) يعنى ببساطة لم اشارك فيها - حاجة منطقية طبعا هشارك ازاى وانا ماكنتش مولود اصلا - لكى افتحر مثل الكثيرين الذين يفتخرون دائما بانهم جيل اكتوبر العظيم وكل انتمائهم لهذا الجيل هو انهم كانوا موجودين وقتها وخلاص ولم يشاركوا حتى برفع شبشب فى وش المحتل !!!! ....... والله العظيم فى منهم كتير , وبالنسبة ليا فكل ما اعرفه عن تلك الحرب هى فقط اشياء شاهدتها فى التليفزيون اوسمعتها من الراديو, او قرائتها من الجرئد والكتب كمعلمومات تاريخية وحقائق لا تقبل التغيير .......
وكعادتى دائما منذ الصغر كنت افرح دائما بيوم السادس من اكتوبر ليس بسبب نصرنا على اسرائيل فى نفس هذا اليوم المشهود من عام 73 , بل لانى هبقى اجازة ومافيش مدرسة فى اليوم ده - يا حلولى .... يا حلولى - , وكثيرا ما كنت افرح بفوز المنتخب الوطنى او فريقى المفضل - الاهلى ....طبعا هو فى حد يشجع نادى تانى فى مصر غيره - اكتر من فرحتى بفوزنا بنصر اكتوبر العظيم على اليهود ......
وهناك الكثيرون ممن يشككون اصلا فى النصر ودائما لديهم نفس الهاجس بخيبتنا فى كافة المجالات ويحسبونها بطريقة كرة القدم ويقولون اننا لم نهزم اسرائيل بل تعادلنا فقط !!!!!! , قبل ان اسمع قدرا من الشتائم واتهامات بالخيانة والعمالة وعدم الوطنية , ادعوك معى لتحليل منطقهم الفلسفى الرشيد - الذى لا احب ان احدد موقفى منه بالاتفاق او بالاختلاف معه ..لاسباب خاصة لا داعى لذكرها حاليا - باسلوب كرة القدم الشهير ....
بص يا سيدى
اسرائيل طرقعت لنا وادتنا على قفانا كمان احنا ومعظم الدول العربية فى حرب 48 .....صح الكلام ولا انا غلطان ؟؟؟؟؟ يبقى كده النتيجة كانت 1-0 , ثم تعادلنا معها فى العدوان الثلاثى 56 ( طبعا الجون ده كان جامد جدا ...لانه جه فى اسرائيل وفرنسا وانجلترا ...... بس للاسف الفيفا بتحسب الجون بجون واحد حتى لو جبناه فى منتخب العالم !!!!!) , كده يبقى وصلنا ان النتيجة 1 -1 بس طبعا كعادة اللاعب المصرى لما يحس بالاطمئنان بيجى فيه جون تانى , وفعلا ده اللى حصل واسرائيل جابت الجون التانى فى نكسة 67 ...... يبقى النتيجة لحد هنا كام ؟؟؟؟ 2-1
لغاية ما عوضنا فى 73 و جبنا جون فى اسرائيل يبقى كده النتيجة 2-2

هل اقتنعت بفلسفة المشككين فى فوزنا على اسرائيل , واقتناعهم بالتعادل فقط , وازيد عليهم فى تحليلى للوضع الحالى للمبارة - طبعا بصفتى بفهم فى الكورة كويس ....اه والنعمة - ان الوقت الاساسى للمبارة اوشك على النهاية وهنلعب فى الوقت الضايع , ويمكن نوصل لاشواط اضافية ( و هنحتكم للهدف الذهبى كمان ) ويمكن نوصل لضربات الجزاء .....
طبعا اللى مركز كويس هيلاقى ان دايما اسرائيل تتقدم علينا بجون , وبعدين احنا نتعادل يعنى فرصتنا الفترة الجاية اقل منهم بكتير فى التأهل للمونديال !!!
ده بمنطق الكورة ....لكن بمنطق السياسة احنا رجعنا ارضنا وطردنا الاحتلال , وسينا رجعت كاملة لينا - ومصر اليوم فى عيد ...........هيه هيه - , ودائما نفتخر اننا هزمنا اسرائيل رغم تشكيك الاسرائلين نفسهم فى هذا النصر - تقريبا كده هما معتبرين الماتش تعادل 2-2 ومستنين صفارة الحكم ....امريكا المتحيزة طبعا ضدنا -, ولا تنتهى الحكاية عند المشككين المصريين بالانتصار العظيم عند هذا الحد بل تصل الى حديثهم الدائم عن ان طابا ليست مصرية كما تزعم الحكومة المصرية دائما وانها مليئة بالاسرائلين والاجانب اكتر من المصريين , واننا ليس لنا الصلاحيات الكاملة فى المنطقة ج من سيناء ( التى لايسمح فيها سوى بتواجد المدنيين والشرطة فقط ....فلا وجود لاى فرد من الجيش المصرى سوى القليل منهم لتأمين الحدود !!!!!!), ولا ينسوا بكل تأكيد التطبيع الاجبارى بين الحكومتين كشرط من شروط اتفاقية السلام ومنها طبعا التطبيع الاشهر ببيع الغاز الطبيعى المصرى لاسرائيل ..................
لا يعنينى من الموضوع السابق سواء الفوز او التعادل .....كل ما يعننى هو اننى هاكون اجازة فى اليوم ده من الشغل وهتفرج على فيلم الطريق لايلات ,واسمع اغنية هيثم شاكر - الهارب من التجنيد ...صراحة لايق اوى عليه انه يغنى اغنية وطنية !!! - بتاعت ايام الفرح الحلوة ...... ودمتم بخير دايما وكل عيد سادس من اكتوبر وانتم بخير.
وبالنسبة لموضوع الماتش بينا وبين اسرائيل والتأهل لكأس العالم يحضرنى قول الممثل محمد سعد فى فيلم (بوشكاش ) ...
احنا مش هنروح كاس العالم .....كأس العالم هو اللى هيجى لحد عندنا مش بس وكده لا وبتاكسى كمان !!!!!