لسوء الحظ وقعت تحت نظرى مجموعة من المقالات الجادة التى قرأتها فى الفترة السابقة , لكنها ويالا العجب مليئة بالسخرية الشديدة , وهذه بعض الامثلة ( مع ملاحظة انى راعيت ذكر المصدر حتى لا اتهم بالتأليف ) :
-"سفاح المعادى يؤكد براءته والمجنى عليهن يتعرفن عليه " نقلا عن اليوم السابع
ماشاء الله سفاح يعنى قاتل لاكثر من ضحية, والمجنى عليهن يتعرفوا عليه , فعلا يحيى العظام وهى رميم .
-"الجيزة» تستقبل «أوباما» فى جامعة القاهرة بزراعة الورود ورصف الشوارع وغسل التماثيل " نقلا عن المصرى اليوم
يعنى هو احنا مالناش نفس عشان يزرعوا لينا ورد ويرصفوا الشوارع ولا لازم ناكل كل المطبات والنقر والحفر , سبحان الله كل ده عشان اوباما , والغريب فى الخبر هى التفاصيل الدقيقة التى اهتمت بها المحافظة لدرجة انهم هينظفوا القبة النحاسية بمادة مخصوصة هتتكلف 50 الف جنية , فعلا هما فاكرين تحت القبة شيخ.
-"مجلس الشعب يرفض سحب الثقة من الحكومة" نقلا عن اليوم السابع
اعتقد الخبر مش محتاج تعليق نهائيا , القرد فى عين امه غزال
-"نور: أحرقونى بـ"الفريون" ولن أستطيع لقاء أوباما " نقلا عن اليوم السابع
يا عم ايمن مش لازم تقابلوا , ابقى اديله تليفون لما يوصل مصر , على الاقل حتى تتحاسب بسعر الدقيقة المحلى ,اللى هى ب 3 قروش واتكلم ارضى يا ابن بلدى .
-"بكرى: لانشون من لحم الخنازير فى الأسواق" نقلا عن اكتر من جريدة
الحمد لله انهم لحقوا بسرعة يكشفوا موضوع اللانشون الخنازيرى , فالشعب المصرى ياما اكل حمير وكلاب وقطط ولسه ما حدش كشف عن اى حاجة فى الاسواق.
-بالصور اليوم السابع ينفرد بنشر استخراج أول شهادتى ميلاد لبهائيين بشرطة " _ "
يا فرحة البهائين بالشرطة _ يعنى انا اسمع ان ( بشرطه ) ده بيبقى اتوبيسات خطوط معينة داخل القاهرة , يعنى هما البهائيين مبسوطين اوى بالشرطة , خليها تنفعهم ,اهو ممكن يستخدموا شهادة الميلاد كوسيلة مواصلات .
دى صورة بسيطة جدا من اخبار مصر فى كام يوم , بس صورة تدل على اللى وصلنا ليه فعلا
ليست هناك تعليقات:
إرسال تعليق