شعب طيب

هل شعرت يوما انك ضللت الطريق الى مهنتك , او انك كنت تتمنى غيرها , اعتقد ان كثيرين مثلى تمنوا ان يكونوا اشخاصا اخرين ذوى مهن مختلفة .
ازداد تمسكى بهذا الموضوع بعد حادثة نصاب الاسكندرية الاخيرة , ولمن لم يعرف هو اسمه سيد -وزى الاغنية ما بتقول سيد يا سيد – فهذا الشقى نصب على مجموعة مواطنين فى مبلغ تافه -150 مليون جنيه مش قولتلكم تافه – والغريب والعجيب ان المصريين شعب يسهل النصب عليه (راجع حوادث النصب الخاصة بالبوشى سنة 2009 و ارجع شوية بكتاب التاريخ هتلاقي السعد والريان فى التسعينات ) دى اخرة اللى ما يذاكرش التاريخ كويس , ويبدو انه كما تفوق المصرى القديم فى كافة المجالات فأعتقد ان الفراعنة هم اول شعوب العالم اخترعوا النصب , واقترح على معدين الموسوعات الثقافية و موسوعات سؤال وجواب ان يضيفوا سؤال من هو اول الشعوب اللذين اخترعوا النصب؟
الاجابة طبعا الفراعنة , اعود الى الموضوع الرئيسى وهو ان الواحد لازم يغير فعلا من مهنته ,فكرت واحترت فقلت اسألكم ايه رأيكم فى موضوع النصب ؟؟؟ مش بطال بيأكل عيش برضوا , بس لاحظت ان الواحد برضوا محتاج يكون عنده شوية مهارات ,يعنى محتاج تكون مقنع بدرجة امتياز ويكون معاك مرتبة لزوم الاقناع –مش تنام عليها – وكمان تكون صادق جدا فى وعودك للناس - ده فى البداية بس طبعا - يعنى اللى يديلك ميت الف جنية تستثمرهم لازم ياخد ارباحه فى ميعادها وبالنسبة المحددة , اكيد هتخسر فى الاول بس السمعة بتاعتك محتاجة تضحى شوية , وكمان عشان تكسب ثقة ناس اكتر.
هو شهر ولا اتنين ولا تلاتة بالكتير , وتنزل صورة الواحد فى الجرايد وهو مبتسم وبيضحك -طبعا بيضحك على الناس اللى نصب عليهم – وكل الناس اللى ما اتنصبش عليهم بتحسده على المبلغ اللى لهفوا .
نسيت اقولكم انى ما عنديش المهارات السابقة لذلك ما فيش امل فيا انى ابقى زى الناس المتميزين دول , عشان كده حبيت اساعد الناس اللى عندها مواهب مش عارفه تستغلها .
كلما سمعت عن حادثة نصب جديدة فى مصر اتذكر فورا مدى طيبة الشعب المصرى , واتذكر اعلانات الدولة عن مدى طيبة وترحاب الشعب المصرى –طبعا الاعلان لجذب السياح اللى طبعا ما بيفهموش عربى – لكن يبدوا ان الاعلان اترجم فى عقول الناس النصابين بصورة تانية واستغلوا طيبة الناس بس بطريقتهم .
نصيحة لوجه الله تابعوا الاعلان الجديد بتاع لازم يكون ليك بنك عشان ما يتنصبش عليك (دى اخرة اللى مش متابع الاعلانات ) وطبعا الكلام ده للناس اللى معاها فلوس طبعا ,عشان ما اسمعش شتايم من ناس كتير هتقولى بنك ايه هو احنا لاقين ناكل !!!!!!